Categories
राशिफल

आजको राशिफल: वि.सं. २०७६ वैशाख १८ गते बुधबार

वि.सं. २०७६ वैशाख १८ गते बुधबार तदनुसार ई. सं. २०१९ मे १ तारिख, मजदुर दिवस, वैशाख कृष्ण द्वादासी ,शतभिषा नक्षत्र, कुम्भ राशिको चन्द्रमा, ऐन्द्र योग, बब र बालब करण,,आजको चाडपर्व र उत्सव : बरुथिनी एकादशी व्रत, त्रिपुष्कर योग राती ११ बजेर ५५ मिनेटपछि, आजको मूहुर्त : रुद्राभिषेक(रुद्रीपूजा), कलशचक्र, भोलिको चाडपर्व र उत्सव : विश्व मजदूर दिवस, भोलिको मूहुर्त : शुभविवाह, रुद्राभिषेक(रुद्रीपूजा), अग्निवास(होमादि), कलशचक्र,

आजका लागि अशुभ समय :
राहु काल : दिउँसो ०३:१९ देखि ०४:५८ सम्म, यमघण्ट : बिहान ०८:४५ देखि १०:२३ सम्म, गुलिक काल : दिउँसो १२:०२ देखि ०१:४१ सम्म, काल वारवेला : दिउँसो ०१:४१ देखि ०३:१९ सम्म, रोग वारवेला : बिहान ०५:२८ देखि ०७:०६ सम्म र साँझ ०४:५८ देखि ०७:५८ सम्म

आजका लागि शुभकर्म प्रारम्भ गर्न उपयुक्त समय :
लाभ वारवेला : बिहान १०:२३ देखि १२:०२ सम्म, भोलि कतै यात्रा गर्ने उपयुक्त साइतको खोजीमा हुनुहुन्छ भने पुरुषको नेतृत्वमा पश्चिम र उत्तर दिशाको तथा स्त्रीको नेतृत्वमा ईशान (उत्तरपूर्व) र आग्नेय (दक्षिणपूर्व) दिशाको यात्रा शुभ हुन्छ । तर बाध्यतावश यात्रामा निस्कनै पर्ने छ भने मिठाइ वा तिल खाएर जुनसुकै दिशाको यात्रा गरेमा पनि शुभफल प्राप्त हुने विश्वास गरिन्छ । पञ्चाङ्गखण्ड समाप्त भएको छ, यहाँ मैले प्रयोग गरेको समय नेपालको राष्ट्रिय समयमा आधारित समय हो । ठाउँअनुसार तिथि, नक्षत्रादि र नामाक्षरमा पनि समय अन्तर हुनेछ ।

मेष (चु, चे, चो, ला, लि, लु, ले, लो, अ) –
आत्मबल बढ्ने छ । राज्यपक्षबाट हुनुपर्ने काममा सफलता प्राप्त हुनेछ । पठनपाठन र प्राज्ञिक क्षेत्रबाट लाभ लिन सकिने छ । शत्रुहरू पराजित हुनेछन् । मातापिता र अभिभावक वर्गको आशीर्वचन प्राप्त हुनेछ । सन्तति र भाइबहिनीले समेत सहयोग गर्नाले सन्तुष्टि मिल्नेछ । नाम, दाम र प्रतिष्ठाका लागि प्रयास गरिने छन् । सुखसुविधा र विलासिताका लागि समय र धनको जोहो हुनसक्छ । बन्दव्यापार, पेसा र रोजगारीका क्षेत्रबाट फाइदा लिन सकिने छ । धार्मिक, सामाजिक र सांस्कृतिक सभासमारोहमा सरिक हुने र लाभ लिन सकिने समय छ । लाभदायक यात्राको सम्भावनालाई पनि नकार्न सकिंदैन ।

शुभरङ्ग : कालो, शुभअङ्क : ३, शुभदिशा : पश्चिम, इष्टदेवता : सरस्वती माता, अशुभ रङ्ग : घिउरङ्ग÷क्रिम, अशुभ अङ्क : ६, अशुभ दिशा : दक्षिण, कार्यसिद्धि मन्त्र : ॐ नीलसरस्वत्यै नमः, न्यूनतम जापसङ्ख्या : २३, के गर्ने : छोराछोरीको उन्नति÷प्रगतिको जानकारी लिने, के नगर्ने : ठूलाबडा र मान्यजनको बेवास्ता

बृष (इ, उ, ए, ओ, बा, बि, बु, बे, बो) –
पितृस्थानमा रहेको चन्द्रमाका कारण वंश, कुल र पितृपक्षका विषयमा घोत्लिन मन लाग्नेछ । हाकिम वा अभिभावकका विचारले प्रभावित तुल्याउन सक्छ । सन्तान पक्षबाट सहयोग प्राप्त हुनेछ । साथीभाइसित भेटघाट हुने योग छ । सामाजिक क्षेत्र र नोकरीबाट मानसम्मान मिल्नेछ । कर्मक्षेत्रमा मिहिनेतका साथमा खट्ने समय छ । आम्दानीको बाटो सहज छ । बन्दव्यापार र कारोबारबाट राम्रो प्रतिफल आउने छ । रोकिएका सरकारी काम सुल्झाउने राम्रो समय छ । स्वास्थ्य सबल रहनेछ । पारिवारिक सम्बन्ध सामान्य ढंगले अघि बढ्ने छ । मायाप्रीति र रसरङ्गमा आकर्षण देखिंदैन ।

शुभरङ्ग : ध्वाँसे, शुभअङ्क : ६, शुभदिशा : दक्षिण, इष्टदेवता : महालक्ष्मी, अशुभ रङ्ग : कलेजी, अशुभ अङ्क : ५, अशुभ दिशा : पूर्व, कार्यसिद्धि मन्त्र : ॐ भूमिदेव्यै नमः, न्यूनतम जापसङ्ख्या : २३, के गर्ने : हाकिम, मान्यजन र पिताका चाहना बुझ्ने, के नगर्ने : लोभ र मोह

मिथुन (का, कि, कु, घ, ङ, छ, के, को, ह) –
आज भाग्य निर्माणको समय छ । सहयोगको आशामा रहेका व्यक्ति वा असहाय र बृद्धबृद्धाको सहयोग गर्नाले भाग्य अभिबृद्धिमा सघाउ पुग्नेछ । पुराना साथीभाइसित भेटघाट हुने र आकस्मिक लाभ मिल्ने दिन छ । सामूहिक नेतृत्व सम्हाल्ने मौका मिल्नेछ । बन्दव्यापारमा लाभ मिल्नेछ । प्रतिभाको कदर हुनेछ । नयाँ ज्ञान प्राप्त हुने समय छ । घरपरिवारमा खुसीको वातावरण सिर्जना हुनेछ । मातापिता, अभिभावक र मान्यजनको आशीर्वचन प्राप्त हुनेछ । ठूलाबडाको सहयोगले महत्त्वपूर्ण कार्य सम्पन्न हुनेछ । परोपकारी समय हो, प्रेम र भाइचारा जीवन्त तुल्याउने अवसर प्राप्त हुनेछ ।

शुभरङ्ग : सेतो वा पहेंलो, शुभअङ्क : ५, शुभदिशा : पूर्व, इष्टदेवता : कुलगुरु÷शिवजी, अशुभ रङ्ग : चम्किलो÷उज्यालो, अशुभ अङ्क : ४, अशुभ दिशा : उत्तर, कार्यसिद्धि मन्त्र : ॐ गुरवे नमः, न्यूनतम जापसङ्ख्या : १९, के गर्ने : बृद्धबृद्धा, असहाय र दीनहीन अवस्थाका व्यक्तिको सहयोग, के नगर्ने : आडम्बर र ढोंगीपन

कर्कट (हि, हु, हे, हो, डा, डि, डु, डे, डो) –
अष्टम भावको चन्द्रमाका कारण बोलीको प्रतिकूल एवं विपरीत अर्थ लाग्ने हुँदा सचेतता एवं संयमता अपनाउनु राम्रो हुन्छ । चोटपटकको भय हुनेछ र बिनापत्ताको आरोप व्यहोर्नु पर्ने दिन छ । धन, धर्म र भाग्यमा हानी पुग्ने तथा स्वास्थ्यमा अचानक गडबडी आउने सम्भावना छ । विभिन्न समस्याहरू झेल्ने समय छ । घरपरिवारभित्र सानातिना समस्या देखिनसक्छन् । मानसिक तनाव र चिडचिडेपना बढ्न सक्छ । सामाजिक र परोपकारका मार्गमा अवरोध हुनेछ । प्रतिष्ठा प्राप्तिका लागि संघर्ष गर्नुपर्छ । पछाडि कुरा काट्नेहरूले षड्यन्त्रको तानाबुना रच्ने प्रयास गर्नेछन् । नजिकैको साथीले समेत कुरो बुझी दिदैंन् ।

शुभरङ्ग : कालो, शुभअङ्क : ८, शुभदिशा : उत्तर, इष्टदेवता : कालभैरव, अशुभ रङ्ग : हरियो, अशुभ अङ्क : ३, अशुभ दिशा : पश्चिम, कार्यसिद्धि मन्त्र : ॐ कालभैरवाय नमः, न्यूनतम जापसङ्ख्या : १०, के गर्ने : उत्ताउलोपन, चञ्चलता र हडबडीमा नियन्त्रण्, के नगर्ने : असुरक्षित यात्रा

सिंह (मा, मि, मु, मे, मो, टा, टि, टु, टे) –
अध्ययन, अध्यापन र लेखनमा खास अभिरुचि हुनेछैन, तर स्वास्थ्यस्थिति र आर्थिक पक्ष बलियो भएर आएको छ । प्रेमसम्बन्ध र प्रणयप्रसङ्गका लागि राम्रो दिन छ । उमङ्ग र स्फूर्तिका कारण शरीर हलुको र फुरुङ्ग हुनेछ । जीवनसाथी वा विपरीतलिङ्गी मित्रसँग मन फुकाएर आफ्ना कुरा राख्न सकिने छ । पारिवारिक जीवनमा रमाइलोपना आउने छ । घरमा माङ्गलिक कृत्य सम्पादन गर्ने वातावरण बन्नेछ । अभिभावकवर्ग वा विशिष्ट व्यक्तिको सहयोग प्राप्त हुनाले कार्य सम्पन्न हुनेछ । मानप्रतिष्ठा र सामाजिक मर्यादामा अभिवृद्धि हुनेछ । घरायसी काममा समय र धन खर्च हुनेछ । आम्दानीमा कमी हुने छैन ।

शुभरङ्ग : गुलाबी वा सिन्दूरे, शुभअङ्क : ७, शुभदिशा : पश्चिम, इष्टदेवता : शिवर्पावती, अशुभ रङ्ग : पहेंलो, अशुभ अङ्क : २, अशुभ दिशा : दक्षिण, कार्यसिद्धि मन्त्र : ॐ गृहलक्ष्म्यै नमः, न्यूनतम जापसङ्ख्या : ११, के गर्ने : परिवारमा अधिकतम समय दिने, के नगर्ने : ख्यालठट्टा र जिस्क्याउने काम

कन्या (टो, प, पि, पु, ष, ण, ठ, पे, पो) –
आर्थिक र व्यवसायिक समस्या समाधान हुनेछन् । तर्कवितर्क, चिन्तन आदिका क्षेत्रमा उल्लेखनीय लाभ हुनेछ । आफन्तले तपाईंका विचार र तर्कको सराहना गर्नेछन् । स्वास्थ्य सबल रहने छ, दैनिक कामकाज सजिलै सम्पन्न हुनेछन् । कल्पना र भावुकतामा रमाउँदा रमाउँदै दिन गएको पत्तो पाउनुहुन्न । आफन्त वा मित्रले आज अप्रत्याशित रूपमा सहयोग गर्नेछन् । प्रेमी÷प्रेमिका वा जीवनसाथीसितको सम्बन्धमा देखिएको समस्या समेत निदान हुनेछ । बन्दव्यापार र साझेदारीबाट राम्रो प्रतिफल प्राप्त हुनेछ । खानपान र मेजमानीको अनुकूलता प्राप्त हुनसक्छ, तर स्वास्थ्यप्रति सचेत हुनु राम्रो हुन्छ ।

शुभरङ्ग : हलुका सेतो, शुभअङ्क : ६, शुभदिशा : दक्षिण, इष्टदेवता : भगवान् शङ्कर, अशुभ रङ्ग : सुन्तले÷गुलाबी, अशुभ अङ्क : १, अशुभ दिशा : पूर्व, कार्यसिद्धि मन्त्र : ॐ रां राहवे नमः, न्यूनतम जापसङ्ख्या : ०८, के गर्ने : समस्या र सङ्कटर्लाइ सार्वजनिक गर्ने, के नगर्ने : स्वास्थ्यप्रति बेवास्ता

तुला (र, रि, रु, रे, रो, ता, ति, तु, ते) –
शैक्षिक, प्राज्ञिक र बौद्धिक क्षेत्रका लागि समय निकाल्न सकेमा प्रगति हुनसक्छ । मानप्रतिष्ठा र सामाजिक मर्यादाका लागि गरेको प्रयास सफल हुनेछ । सन्ततिको पठनपाठन र व्यक्तित्वविकासको चिन्ताले सताउन सक्छ । तिनका भौतिक, बौद्धिक र शैक्षिक समस्यालाई निराकरण गर्ने प्रयास गर्नुपर्छ । जानकार व्यक्ति वा गुरुजनले सहयोग गर्नाले आत्मबल बढ्ने छ । बन्दव्यापारबाट लाभ नै हुनेछ । पठनपाठन र चिन्तनमननमा ध्यान केन्द्रित हुनसक्छ । पारिवारिक सहयोग र सद्भावमा कमी आए पनि आफैंले गरेको निर्णय फलदायी हुनेछ । प्रेमसम्बन्ध र दाम्पत्यजीवनमा नैराश्यता बढ्ने सङ्केत छ ।

शुभरङ्ग : हलुका नीलो वा हरियो, शुभअङ्क : १, शुभदिशा : पूर्व, इष्टदेवता : सरस्वती माता, अशुभ रङ्ग : कालो, अशुभ अङ्क : ३, अशुभ दिशा : उत्तर, कार्यसिद्धि मन्त्र : ॐ सरस्वत्यै नमः, न्यूनतम जापसङ्ख्या : ०७, के गर्ने : सिर्जनात्मकता र रचनात्मकतामा जोड दिने, के नगर्ने : बुद्धिको दुरुपयोग

बृश्चिक (तो, ना, नि, नु, ने, नो, या, यि, यु) –
आज चतुर्थ भावमा रहेको चन्द्रमाले घरगृहस्थीका झिनामसिना काममा खट्ने प्रेरणा प्रदान गर्नेछ । छरछिमेकी वा साथीभाइका क्रियाकलाप देखेर दिक्क मान्न सकिन्छ । कुनै किसिमको झैझगडा र वादविवाद हानिकारक बन्ने भएकाले सतर्क रहनु पर्छ । प्रेमसम्बन्ध वा रागात्मक मनोभावनाका कारणसमेत निराशा हुनेछ । भाइबहिनी र सन्तानपक्षका समस्या र क्रियाकलापसमेत चित्त बुझ्दो हुँदैन । मनोरञ्जन र खेलवाडले बेफाइदा हुनसक्छ । तर परदेशमा बस्ने वा वैदेशिक रोजगारी गर्नेेहरूले आज घरायसी कुरा सम्झेर दिन बिताउने छन् । मातापिता वा अभिभावकसँग कुराकानी गरी खैखबर लिनु उचित हुनेछ ।

शुभरङ्ग : रातो वा पहेंलो, शुभअङ्क : ४, शुभदिशा : उत्तर, इष्टदेवता : भगवती दुर्गा, अशुभ रङ्ग : गाढा नीलो, अशुभ अङ्क : २, अशुभ दिशा : पश्चिम, कार्यसिद्धि मन्त्र : ॐ नमश्चण्डिकायै, न्यूनतम जापसङ्ख्या : ११, के गर्ने : पति÷पत्नी, प्रेमी÷प्रेमिका वा छोराछोरीको चाहना पूरा गर्ने, के नगर्ने : घरपरिवारका कुरामा बेवास्ता

धनु (ये, यो, भ, भि, भु, ध, फा, ढ, भे) –
आज पराक्रम र प्रसिद्धि आर्जन गर्न सकिने स्वर्णिम समय हो । अल्छी गरेर वा चुप लागेर बस्नु ठिक हुँदैन । सामाजिक कार्यमा नेतृत्वदायी भूमिका वहन गर्नु पर्नेछ । सम्मान प्राप्त हुनेछ । बोलीको प्रभाव रहनाले काम बन्नेछ । चेलीबेटी वा कुटुम्बका तर्फबाट खुसीको खबर प्राप्त हुने सम्भावना छ । विद्वान् र प्राज्ञिक व्यक्तिहरूसित सुमधुर सम्बन्ध कायम हुनेछ । विदेश वा दूरदराजमा बसेका व्यक्तिहरूसँग सुमधुर सम्बन्ध कायम हुनेछ । लामो दूरीको लाभदायक यात्राको सम्भावना छ । सामाजिक र सांस्कृतिक क्रियाकलापमा संलग्न हुन मन लाग्नेछ । बन्धुबान्धव र दाजुभाइको सहयोग लिनसकिने छ ।

शुभरङ्ग : गाढा नीलो, शुभअङ्क : ३, शुभदिशा : पश्चिम, इष्टदेवता : गणेश, अशुभ रङ्ग : गुलाबी वा सिन्दूरे, अशुभ अङ्क : १, अशुभ दिशा : दक्षिण, कार्यसिद्धि मन्त्र : ॐ सिद्धिविनायकाय नमः, न्यूनतम जापसङ्ख्या : ०८, के गर्ने : साथीभाइको सङ्गत र गफगाफमा नियन्त्रण, के नगर्ने : घमण्ड

मकर (भो, ज, जि, खि, खु, खे, खो, गा, गि) –
आज नयाँ काममा हात हाल्ने समय भएकाले आफ्ना विचारलाई कार्यान्वयन गर्दा राम्रो हुन्छ । मनमा बसाइ सर्ने, सरुवा हुने, स्थान परिवर्तन अथवा व्यवसाय वा पेसामा परिवर्तनको धारणा पलाउने छ । प्रशस्त धन आर्जन गर्ने अवसर पाउनुहुनेछ । प्रतियोगितात्मक क्रियाकलापमा सफलता पाइने छ । सामाजिक र व्यक्तिगत प्रतिष्ठा स्थापना गर्ने राम्रो मौका छ । पढाइलेखाइको क्षेत्रमा प्रगति हुनेछ । आत्मविश्वास बढ्नेछ । विशिष्ट व्यक्तित्वसँग भेटघाट हुनेछ । पारिवारिक जमघटमा मन रमाउनेछ । वस्त्र, अलङ्कार आदि खरिद गर्ने योग छ । कुनै नयाँ ठाउँमा निवेश र लगानीको वातावरण समेत बन्नेछ ।

शुभरङ्ग : घिउ रङ, शुभअङ्क : २, शुभदिशा : दक्षिण, इष्टदेवता : लक्ष्मी माता, अशुभ रङ्ग : पहेंलो, अशुभ अङ्क : ९, अशुभ दिशा : पूर्व, कार्यसिद्धि मन्त्र : ॐ महालक्ष्म्यै नमः , न्यूनतम जापसङ्ख्या : ११, के गर्ने : सुमधुर बोलीवचनको प्रयोग गर्ने, के नगर्ने : अनावश्यक खानपान

कुम्भ (गु, गे, गो, सा, सि, सु, से, सो, द) –
साथीभाइ र परिवारका सदस्यहरूले सहयोग गर्नेछन् । सन्तति र भाइबहिनीका पक्षबाट सन्तोष मिल्नेछ । व्यवसायिक क्षेत्र लाभप्रद रहने छ । भौतिक साधनको जोहो हुनाका साथै मनोरञ्जनात्मक क्रियाकलापमा सक्रिय हुने अवसर जुट्ने छ । तर मनमा कताकता दोधारको स्थिति भने आउनसक्छ । व्यापारिक वा दैनिक कामहरू सन्तोषजनक ढंगले सम्पन्न हुनेछन् । खानपिनका परिकार प्राप्त हुने र भ्रमण, पर्यटन, रमझम तथा सामाजिक काममा सहभागी हुनु पर्नेछ । धार्मिक र सामाजिक काममा मन जान सक्छ । दानपुण्यका क्षेत्रमा लगानी हुनसक्छ । घरपरिवारबाट साथसहयोग प्राप्त हुनेछ ।

शुभरङ्ग : सिन्दूरे रातो, शुभअङ्क : ९, शुभदिशा : पूर्व, इष्टदेवता : हनुमान्, अशुभ रङ्ग : हरियो, अशुभ अङ्क : ८, अशुभ दिशा : उत्तर, कार्यसिद्धि मन्त्र : ॐ हं हनुमते नमः, न्यूनतम जापसङ्ख्या : १०, के गर्ने : निर्णय गर्दा राम्ररी सोचविचार गर्ने, के नगर्ने : हडबड र शीघ्रता,

मीन (दि, दु, थ, झ, ञ, दे, दो, च, चि) –
खर्च बृद्धि हुने समय चल्दैछ । बाह्रौं भावको चन्द्रमाका कारण काममा बाधा हुनाले र धनको अभावमा मनमा अशान्ति र छटपटी व्याप्त हुने छ । उता शरीरमा स्फूर्ति र उमङ्गको कमी हुनेछ, नयाँ कामका निम्ति शरीरमा उत्साह आउने छैन, निर्णय क्षमतामा कमी भएको अनुभूति हुनेछ । यात्रामा पनि झमेला आउनसक्छ, सवारी साधन चलाउँदा वा बाटो काट्दा होस राख्नु पर्छ । स्वास्थ्यमा पनि अनुकूलता देखिंदैन, खानपानमा नियन्त्रण गर्नु राम्रो हो । मन नपरेको खबर सुन्ने योग छ, साथै नकारात्मक भावनाले दुःखित बनाउन सक्छ । त्यस्तै चिन्ता र शङ्का पनि आजका शत्रु हुन्, अतः मानसिक तनाव बढ्नाले मनमा दोधारको अवस्था सिर्जना हुनेछ ।

शुभरङ्ग : सेतो वा बैैजनी, शुभअङ्क : ४, शुभदिशा : उत्तर, इष्टदेवता : धर्मराज, अशुभ रङ्ग : हरियो÷चम्किलो, अशुभ अङ्क : ७, अशुभ दिशा : पश्चिम, कार्यसिद्धि मन्त्र : ॐ चित्रगुप्ताय नमः, न्यूनतम जापसङ्ख्या : १९, के गर्ने : दान, धर्म, परोपकार, के नगर्ने : रिसराग, उद्वेग र क्रोध

(द्रष्टव्य : आज उल्लेख गरिएको राशिफल असल वा खराब जेजस्तो भए पनि तपाईंले आफ्नो कामप्रति निष्ठा जनाउनु पर्दछ, कर्तव्यपालना गर्नु पर्दछ र परोपकारी÷सामाजिक भावना राख्नु पर्दछ, यसो गर्नुभएमा अनिष्ट नाश हुन्छ वा न्यूनीकरण हुनेछ र राम्रो राशिफल छ भने अझ धेरै शुभफल प्राप्त हुनेछ ।)

Categories
ताजा समाचार

वीरगन्जमा भीषण आगलागी

वीरगन्ज – वीरगन्जको श्रीपुरस्थित एक उद्योगमा भीषण आगलागी भएकाे छ। मंगलवार साँझ ६ बजे अागलागी भएको प्रहरीले जनाएको छ।

‘केमिकल भएको उद्योग हो, नाम र अरु विवरण अाउन बाँकी छ, आगो नियन्त्रणमा लिने प्रयास भैरहेको छ,’ पर्साका प्रहरी उपरीक्षक रेवती ढकालले भने, ‘यति क्षति भयाे भन्ने अवस्था छैन।’ आगो नियन्त्रण गर्न नेपाल प्रहरी, सशस्त्र प्रहरी बल र नेपाली सेनाका टोली खटिएका छन्। वीरगन्ज महानगरपालिकाका २ वटा दमकलको सहयोगमा आगो निभाउने काम भइरहेको छ।

बाक्लो बस्तीबीच उक्त आगलागी भएकाे र मानवीय क्षति कति भयाे भन्नेबारे पनि पत्ता लाग्न सकेकाे छैन।
वीरगन्जको श्रीपुरस्थित एक उद्योगमा भीषण आगलागी भएकाे छ। मंगलवार साँझ ६ बजे अागलागी भएको प्रहरीले जनाएको छ।

‘केमिकल भएको उद्योग हो, नाम र अरु विवरण अाउन बाँकी छ, आगो नियन्त्रणमा लिने प्रयास भैरहेको छ,’ पर्साका प्रहरी उपरीक्षक रेवती ढकालले भने, ‘यति क्षति भयाे भन्ने अवस्था छैन।’

आगो नियन्त्रण गर्न नेपाल प्रहरी, सशस्त्र प्रहरी बल र नेपाली सेनाका टोली खटिएका छन्। वीरगन्ज महानगरपालिकाका २ वटा दमकलको सहयोगमा आगो निभाउने काम भइरहेको छ। बाक्लो बस्तीबीच उक्त आगलागी भएकाे र मानवीय क्षति कति भयाे भन्नेबारे पनि पत्ता लाग्न सकेकाे छैन।

Categories
राजनीतिक

जिल्ला इन्चार्जसहित विप्लवका १० कार्यक्रता प्रक्राउ

बाजुरा : जिल्ला प्रहरी कार्यालय बाजुराले विप्लव समूहका बाजुरा इन्चार्जसहित १० जनालाई प्रक्राउ गरेको छ। जिल्ला प्रहरी कार्यालय बाजुराबाट गएको प्रहरी टोलीले बुढिगंगा नगरपालिकाका- १ अम्कोटबाट पक्राउ गरेको जिल्ला प्रहरी कार्यालय बाजुरा प्रमुख डिएसपी उद्धबसिं भाटले बताए।

प्रक्राउ पर्नेमा बाजुरा इन्चार्ज भुप्रेन्द्र विक, सचिब भरत थापा, जिल्ला कमिटि सदस्य अंगराज भण्डारी र पबित्रा बिक रहेका छन्। त्यस्तै, विद्यार्थी कमिटिका गोरख रोकाया, समिक्षा बिक, सुशिला बिक, सुस्मिता बिक, केशातार बिक र प्रेम थापा रहेको प्रहरीले जनाएको छ। उनीहरुलाई मंगलबार बिहान ५ बजे प्रक्राउ गरेको हो।

प्रहरीले प्रक्राउ उनीहरुको साथबाट डेटोनेटर २ वटा, हेन्डग्रिनेट २ वटा र २ पाकेट गन पाउडर बरामत गरेको छ। त्यस्तै लाखौं रकम चन्दा संकलन गरेको चन्दा रसिद पनि फेला पारेको प्रहरी प्रमुख उद्धव भाटले बताए।

प्रहरीले उनीहरु गाउँमा गएर चन्दा संकलन गर्नुका साथै विभिन्न गतिविधि गर्दै आएको भन्दै प्रक्राउ गरेको हो।प्रक्राउ परेका विप्लव समूहका कार्यक्रतालाई मुद्धा चलाउने जनाएको छ।उनलाई मुलुकी अपराध संहिता ऐन २०७४ को परिच्छेद ७ को दफा १ सय ३८ अनुसार विस्फोटक पदार्थ सम्बन्धी कसुर ऐन लगाइने प्रहरी जनाएको छ।

Categories
सूचना प्रविधि

इन्टरनेट सेवा शूल्क घटाउने गरी दुरसञ्चार ऐन आउँदै

काठमाडौं । सरकारले इन्टरनेट शुल्क घटाउने गरी दूरसञ्चार ऐन, २०५३ लाई संशोधन गर्ने तयारी गरेको छ ।

सञ्चार तथा सूचना प्रविधि मन्त्रालयले दुरसञ्चार ऐनलाई संशोधन गर्ने सम्बन्धी विधेयक तयार गरी स्वीकृतिका लागि अर्थ मन्त्रालयमा पठाएको छ ।सञ्चार मन्त्रालयका सचिव महेन्द्रमान गुरुङले अर्थ मन्त्रालयबाट स्वीकृति पाएपछि कानून् मन्त्रालयसँग समन्वय गरी विधेयक अघि बढाउने बताए ।

हाल प्रचलनमा रहेको दूरसञ्चार ऐन २०५३ ले दूरसञ्चार क्षेत्रको धेरै विषय समेट्न नसक्ने हुनाले संशोधन गर्न लागेको सञ्चार सचिव गुरुङको भनाइ छ ।
सोमबार संसदको विकास तथा प्रविधि समितिको बैठकमा सूचना प्रविधिसम्बन्धी विधेयकमाथिको छलफलका क्रममा सांसदहरुले नेपालमा इन्टरनेट सेवा शूल्क महंगो भएको भन्दै सरकारको ध्यानाकर्षण गरेका थिए । जवाफमा सचिव गुरुङले ऐन संशोधन गरी शुल्क घटाउने व्यवस्था गर्ने बताए ।

‘नेपालमा इन्टरनेट शुल्क साह्रै महंगो भयो । भारतमा एक सयले महिनाभर इन्टरनेट चलाउन सकिन्छ । तर, नेपालमा एक हजारले पनि पुग्दैन’, सांसद गौरीशंकर चौधरीले भने ।

समिति सभापति कल्याणी खड्काले इन्टरनेट शूल्कबारे छलफल हुनुपर्ने बताइन् । ‘अहिले इन्टरनेट चलाउन पैसा नलाग्ने तर, यो विधेयक आएपछि शूल्क लाग्ने भयो भन्ने जस्तो गरी प्रचार भएको छ’, उनले भनिन्, अहिले पनि हामीले इन्टरनेट चलाउँदा पैसा तिरिरहेका छौं । यो भुल्नु हुँदैन ।’

‘सामाजिक सञ्जाललाई नियन्त्रण होइन नियमन गरौं’
उपसमितिको बैठकमा सांसदहरुले सामाजिक सञ्जाललाई नियन्त्रण नभई नियमन गर्नुपर्नेमा जोड दिए ।

सरकारले ल्याएको सूचना प्रविधिको सम्बन्धमा व्यवस्था गर्न बनेको विधेयकले सामाजिक सञ्जाललाई नियन्त्रण गर्न खोजेको भन्ने सन्देश प्रवाह भइरहेको भन्दै सांसदहरुले त्यसबारे सरकारले नै प्रष्ट पार्नु सक्नुपर्नेमा जोड दिए ।

‘आम जनतामा सरकारले सामाजिक सञ्जाललाई नियन्त्रण गर्न खोजेको भन्ने सन्देश प्रवाह भइरहेको छ । विभिन्न कार्यक्रममा जाँदा विधेयकको मर्म त्यस्तो होइन भनेर हामी चाहिँ सरकारको प्रवक्ता जस्तो हुनुपरेको छ’समिति सभापति खड्काले भनिन् ।

उनले ऐनमा दोहोरो अर्थ लाग्ने र अस्पष्ट वाक्यांश राख्न नहुने भन्दै ऐन बनाउँदा जनताले प्रष्ट बुझ्ने शब्दहरु प्रयोग गर्न सुझाइन् ।
उपसमिति सदस्य इन्द्रकुमारी शर्माले पछिल्लो समयमा प्रविधिको सदुपयोग भन्दा दुरुपयोग बढेको उल्लेख गरिन् ।
अर्का उपसमिति सदस्य केदार सिग्देलले सरोकारवाला पक्षको सुझाव र सल्लाहका आधारमा सूचना प्रविधि विधेयक थप परिस्कृत हुनुपर्ने बताए ।

उपसमितिको एक महिने कार्यकालमा काम शून्य !
संसदमा छलफलमा रहेको सूचना प्रविधिको सम्बन्धमा व्यवस्था गर्न बनेको विधेयकमाथि दफावार छलफल गरी प्रतिवेदन तयार पार्न भन्दै विकास समितिले गत चैत १८ गते सात सदस्यीय उपसमिति गठन गरेको थियो ।

समिति सचिवालयका अनुसार उक्त उपसमितिको बैठक यही वैशाख ९ गते बसेको थियो र विनाकुमारी श्रेष्ठलाई संयोजक तोक्यो । त्यसपछिको दोस्रो बैठक सोमबार मात्रै बसेको हो । सोमबारको बैठकले विधेयकमाथि पुनः एकपटक सैद्धान्तिक छलफल गर्ने विधेयकमाथि संशोधन दर्ता गर्ने सांसदहरुसँग छलफल गर्ने निर्णय गरेको छ । विधेयकमाथि २८ जना सांसदले ९ वटा संशोधन प्रस्ताव दर्ता गरेका छन् ।

एक महिनाको समय पाएको उपसमितिको म्याद भने बिहिबार सकिँदैछ । सोमबारको बैठकले मूल समितिसमक्ष म्याद थप सम्बन्धी प्रस्ताव लैजाने निर्णय पनि गरेको छ । हिउँदे अधिवेशन अन्त्य भएको र वर्षे अधिवेशन शुरु नभएका कारण सांसदहरु राजधानी बाहिर गएकाले उपसमितिले काम गर्न नसकेको उपसमिति संयोजक श्रेष्ठ बताउँछिन् ।

उनी भन्छिन्, ‘वर्षे अधिवेशन पनि सुरु भयो । अब माननीयहरु नियमित उपलब्ध हुने भएकाले विधेयकमाथिको दफावार छलफल गरेर छिट्टै टुङ्गो लगाउँछौं ।’श्रेष्ठको संयोजकत्वको उपसमितिमा सांसदहरु राजेन्द्र लिंदेन, इन्दु शर्मा, बहादुरसिंह लामा, अनिल झा, केदार सिग्देल र गौरीशंकर चौधरी सदस्य रहेका छन् ।

Categories
ताजा समाचार

प्राधिकरण पूर्वाग्रही कि पाइलट विजय लामा अनुशासनहीन ? विजय लामाको न्यायको लागि एक सेयर गरौ

काठमाडौं । नेपाल एयरलाइन्सका ‘सेलिब्रिटी पाइलट’ विजय लामा निलम्बनमा परे भनेर सोमबार दिउँसो केही अनलाइनमा समाचार आए । लगत्तै सामाजिक सञ्जालमा लामाको बचाउमा स्टाटसहरु ह्वार्रह्वार झर्न थाले । यद्यपि, त्यो खबर पूर्ण सत्य थिएन ।

समाचारमा आएजस्तो लामाको लाइसेन्स निलम्बन भएको नभएर उनी प्रवक्ताको जिम्मेवारीबाट मात्रै हटाइएका थिए । निगमका कार्यकारी अध्यक्ष मदन खरेलले हस्ताक्षर गरेको पत्रमा ‘तपाईंलाई तत्कालैदेखि लागू हुने गरी हाल सम्हालिआउनुभएको प्रवक्ताबाट हटाइएको’ उल्लेख छ । यो पनि एकप्रकारको कारवाही नै हो, तर निलम्बनजस्तो गम्भीर होइन । त्यसोभए, निलम्बनको समाचार कसरी आयो त ?

खासमा सोमबार नेपाल नागरिक उड्ड्यन प्राधिकरणले लामालाई एउटा पत्र पठाएको थियो, जसमा उनले दोहोरो जिम्मेवारी सम्हाल्दा उडान सुरक्षा प्रभावित बन्ने तर्क गर्दै पाइलट र प्रवक्तामध्ये एउटा जिम्मेवारी छोड्न भनिएको छ । प्राधिकरणको पत्रमा लामालाई ‘अनुशासनको कारवाही’ गरिएको झल्किँदैन । प्राविधिक अप्ठेरो देखाएर एउटा जिम्मेवारी छोड्न भनिएको छ । तथापि, यो प्रकरणको चुरो भनेको लामाबाट भएको ‘अनुशासन उल्लंघन’ नै हो ।

पत्रमा लेखिएको छ, ‘एनएसीको प्रवक्ताका रुपमा अतिरिक्त जिम्मेवारी निभाउँदा तपाईंमा पर्न सक्ने दबाव उडान सुरक्षाका लागिले घातक हुन सक्ने तथ्यलाई ध्यान दिँदै प्राधिकरणले २६ अप्रिल (१३ वैशाख) मा गरेको निर्णयअनुसार तपाईंलाई सुचित गरिन्छ कि जबसम्म तपाईं प्रवक्ताको जिम्मेवारीबाट मुक्त हुनुहुन्न, तबसम्म प्राधिकरणले जारी गरेको एयरलाइन ट्रान्सपोर्ट पाइलट लाइसेन्स १४४ (ए) लाई उपभोग गर्न सक्नुहुने छैन ।’

यसको अर्थ हो, निगमको प्रवक्ता रहेसम्म लाइसेन्स निलम्बन हुने । सो पत्र आएलगत्तै निगमले लामालाई सोमबार नै प्रवक्ताबाट हटायो र यसको जानकारी प्राधिकरणलाई गरायो । त्यसैले लामाको लाइसेन्स निलम्बन हुनबाट जोगियो । तर, हतारमा समाचार लेखिँदा गलत सन्देश सम्प्रेषण हुन पुग्यो ।
प्राधिकरणको पत्रमा लामालाई ‘अनुशासनको कारवाही’ गरिएको झल्किँदैन । प्राविधिक अप्ठेरो देखाएर एउटा जिम्मेवारी छोड्न भनिएको छ । तथापि, यो प्रकरणको चुरो भनेको लामाबाट भएको ‘अनुशासन उल्लंघन’ नै हो ।

लामाले एउटा यूट्यूव च्यानललाई दिएको अन्तरवार्तालाई लिएर प्रश्न उठाउँदै प्राधिकरणले उनलाई स्पष्टीकरण सोधेको थियो । यद्यपि, स्पष्टीकरण पत्रमा पनि अनुशासन उल्लघंनको सिधा आरोप लगाइएको छैन ।

लामाले यूट्यूव अन्तरवार्तामा के भनेका थिए भनेर खोतल्नु अगाडि यस प्रकरणको जरोतिर फर्किउँ ।
गत चैत १९ गतेको घटना यससँग जोडिएको छ । त्यसदिन राति सवा ९ बजे दुबईका लागि उड्नुपर्ने एनएसीको जहाज रातभर काठमाडौं बिमानस्थलमा रोकिएको थियो । प्राधिकरणले ४ मिनेट पनि समय नदिँदा उडान हुन नसकेको र यसले निगमको साख गिर्नुका साथै आर्थिक क्षतिसमेत भएको भन्दै लामाले प्राधिकरणको नेतृत्वमाथि आक्रोश पोखेका थिए ।

के भएको थियो ?
नेपाल एयरलाइन्स विमान डिलेका लागि ‘प्रख्यात’ नै छ । यसका उडानहरु केही मिनेट होइन, केही घन्टा ढिला हुनु पनि सामान्य मानिन्छ । तर, त्यस दिन भएको ढिलाईमा निगम जिम्मेवार नभएको लामाको तर्क थियो । आखिर के भएको थियो त १९ चैतमा ?

करिब चार महिनाअघि विमानस्थलले नोटाम (विमानस्थल बन्दको सूचना) जारी गरेको थियो, जसमा धावनमार्गमा नयाँ कालोपत्रे गर्नुपर्ने भएकाले अप्रिल १ देखि तीन महिनाका लागि दैनिक १० घन्टा बिमानस्थल बन्द गरिने उल्लेख थियो ।

नेपाल एयरलाइन्सको दुबई उडान नोटामबाट प्रभावित हुने समयभित्र पर्दैन । किनकि यससँग अतिरिक्त ४५ मिनेट समय हुन्छ । त्यस दिन आर ए २३१ विमानलाई निगमका पाइलटले बेलुकी सात बजेदेखि ह्यांगरबाट पार्किङ वेमा ल्याउने अनुमति मागेको बताइएको छ । एयर ट्राफिक कन्ट्रोलले ८ः३५ मा मात्रै अनुमति दिए । तैपनि ८ः३५ मा उड्ययन गेटमा राखिएको जहाजले आरामसँग ९ः३० भित्रमा उड्न सक्थ्यो ।

तर, यात्रुहरु मिसप्लेस हुँदा केही ढिलाइ भयो । समाचारमा आएअनुसार, निगमको दोहा जानुपर्ने यात्रु र दुबई जानुपर्ने यात्रु अलमलमा गलत जहाजमा बस्न पुगेका थिए । उनीहरुलाई सार्ने क्रममा केही समय गुज्रियो । यात्रुहरु ९ः३५ बजे मात्रै सही विमानमा बसे । त्यसपछि बिमानमा इन्धन राखियो । ९ः४५ मा इन्जिनियरिङ टिमले उडानका लागि अनुमति दियो र बिमानका सबै ढोका बन्द गरिए । अनि, बल्ल पाइलटले एटीसीसँग उडान अनुमति मागे ।

तर, निगमको जहाजभन्दा अगाडि ड्रागन एयरको वाइडबडी जहाजले अनुमति पाइसकेको थियो । नेपाल एयरलाइन्सले यात्रु चढाउन थालेपछि ९ः१० मा हङकङबाट क्याथे ड्रागन ल्यान्ड भएको थियो । उसले यात्रु उतारेर यताका यात्रु फटाफट चढायो । ड्रागन एयरको जहाज रनवेमा जाँदा निगमको जहाज ट्याक्सी वेमै थियो । ड्रागनका कारण बोर्डिङ गरिसकेको निगमको जहाजलाई रन वेमा जान केही मिनेट ढिला भएको थियो । दुईवटा वाइडबडी एकैपटक रन वेमा लैजान मिल्दैन । र, ड्रागन ९ः५७ मा तीन सय ५ यात्रु लिएर उडिहाल्यो । तर, निगमको बिमान हेरेको हेर्‍यै भयो । १० बजेपछि विमानस्थल बन्द भएको भन्दै कन्ट्रोल टावरले निगमको जहाजलाई उडान अनुमति दिन नसक्ने बताइदियो ।

चालक दलका १४ सदस्यसहित २७६ यात्रु विमानभित्र थिए । ११ः०७ मा चालक र क्रु मेम्बर सबै निस्किए । यात्रुहरुले भने उडान हुनुपर्ने भन्दै होहल्ला गरे । केही यात्रुलाई निगमले निकालेर होटलमा लगेर राख्यो । तर, सयौं यात्रु जहाजभित्रै छोडिए । राति ९ बजे जहाजमा चढेका यात्रुलाई भोलिपल्ट बिहान ५ः१५ मा मात्रै प्रहरीले बाहिर निकाल्यो ।

निगमका प्रवक्ता लामाले आफ्नो पाइलटले उडानका लागि ४ मिनेटको समय माग्दा पनि एटीसीले नदिएको बताएका छन् । विमानस्थल प्रशासनले भने १० बजे विमानस्थल बन्द भएपछि मात्रै अनुमति मागिएको दाबी गरेको छ । रातभर यात्रुलाई धावनमार्गमा रहेको विमानभित्र राखिनु यो एउटा गम्भीर घटना हो । यसमा नागरिक, निगमका पाइलट र एयर ट्राफिक कन्ट्रोलर दुवैतर्फको कमजोरी रहेको भनेर सरकारद्वारा गठिन छानविन समितिले प्रतिवेदन बुझाएको छ । प्रतिवेदनमा एटीसीमा रहेका कर्मचारीले मानवीय हिसाबले परिपक्व निर्णय लिन नसकेको ठहर्‍याइएको छ भने बिमानस्थलमा भएका निगमका कर्मचारीले सञ्चार समन्वयमा कमजोरी गरेको जनाइएको छ ।

पर्यटन मन्त्रालयका सहसचिव बुद्धिसागर लामिछानेको संयोजकत्वमा गठित समितिले घटनासँग सम्वन्धित विभिन्न निकायका ६ जना कर्मचारीलाई विभागीय कारवाहीका लागि सिफारिस गरेको छ ।

यात्रुहरु रातभर विमानभित्र अलपत्र परेको घटनाका बारेमा पाइलट विजय लामाले फेसबुकमा लेखेको प्रष्टीकरण यस्तो छ–
१. ह्यांगरमा राखिएको जहाजलाई पार्किङ वे ल्याउनलाई साँझ ६ बजेदेखि अनुमति माग्दा पनि ८ः२५ प्राप्त भएपछि मात्र वेमा ल्याइएको अनि ८ः३५ मा जहाजको ढोका खोलिएको र उडान कर्मचारी छिरेको ।

२. ए ३३० वाइडबडीलाई त उडान तयारी कम्तीमा १ घन्टा ३० मिनेट लाग्छ । त्यही पनि सबैको सहयोग र नोटामको समयलाई ध्यानमा राखी साढे ९ बजे यात्रु सबै राखी उडान तयारी अवस्थामा हुँदा सानो प्राविधिक कारण ढोका खोलिएको अनि पुन ९ः४५ मा बन्द गरी उडान अनुमति ९ः४७ मा मागेको । त्यो भनेको नोटाम सुरु हुनुभन्दा १३ मिनेट अगाडि नै मागेको । पुस ब्याक गरेको ४ मिनेटमा नै उडान भर्न सक्छु भन्दा पनि अनुमति दिइएन ! कतै पनि तोकिएको नोटामको समय कट्दैन थियो ।

३. ड्रागन एयर ९ः५७ मिनेटमा उडेको ।
४. १० बजे नै टावर र विमानस्थल बन्द भएको । यदि त्यो ड्रागन एयरले ३० मिनेटभित्र आकस्मिक अवतरण गर्नुपरेको भए के हुन्थ्यो ? नेपालको हवाई क्षेत्र छाडेर जान नै करिब १५ मिनेट लाग्छ ।

लामाको ‘विवादस्पद’ अन्तरवार्ता
निगमको प्रवक्ताका हैसियतले लामाले दिएको यो प्रष्टीकरण स्वाभाविक नै थियो । तर, त्यसभन्दा अगाडि नै उनले एउटा यूट्यूव च्यानललाई आक्रामक अन्तरवार्ता दिएका थिए, जसलाई प्राधिकरणले पचाउन सकेन । अन्तरवार्तामा उनले आफ्नो लाइसेन्स खारेज गर्न प्राधिकरणलाई चुनौति दिएका थिए ।

‘सत्य बोल्दा जागिर धरापमा पर्छ भने अरु काम गरौंला,’ उनले अन्तरवार्तामा भनेका छन्, ‘कालो खाए पो कालो निकालिन्छ । मलाई डराउनुपर्ने केही आवश्यकता छैन ।’

युट्युव अन्तरवार्तामा उनले बोलेका केही शब्द यस्ता थिए :
‘‘हामी थकित छौं, स्ट्रेसमा छौं । यसमा कामको कुरा आउँछ । स्वास्थ्यको कुरा आउँछ । आज रातभरि निद्रा लागेको छैन । नेपाल एयरलाइन्सको चिन्ता छ । धेरै सोचमा बस्दा बस्दा थाकिँदो रहेछ । आफ्नो गल्ती भएको भए सायद फरक पर्दैनथ्यो, क्षमा माग्ने थियौं । तर, आफ्नो गल्ती नहुँदा नेपाल एयरलाइन्स र यात्रुलाई दुःख हुने र समस्त उडान उथलपुथल हुने समस्या आउँदा गाह्रो हुँदो रहेछ ।’

‘विमानस्थलको रन वे जीर्ण अवस्थामा छ, र त्यसलाई मर्मत गर्ने कुरामा म पनि खुशी छु । तर, यात्रुहरु बोर्ड भइसकेको जहाजलाई उड्नका लागि ४ मिनेट पनि नदिइनु आपत्तिजनक हो । यस्तो अवस्थामा १ घन्टा मागेको भए पनि दिनुपथ्र्यो ।’

‘पार्किङ स्पेस छैन भने यतिका एयरलाइन्सलाई किन अनुमति दिइयो ? तपाईंको घरमा १० बेड छ भने ३० जनालाई कसरी सुताउने ?’
प्राधिकरणले सोधेको स्पष्टीकरणमा लामाले कडा जवाफ फर्काएका थिए । उनले प्राधिकरणसँग आफूलाई स्पष्टीकरण सोध्ने अधिकारै नभएको बताएका छन् ।
‘राष्ट्रसँग संलग्न संयन्त्रहरुले राष्ट्रिय ध्वजाबाहकलाई सहुलियत दिनु पर्छ कि पर्दैन ? केही दिएको छ ? हिजो ४ मिनेट दिएको भए के रन वे नै पूरा फुटेर आउँथ्यो ? देश समृद्ध बनाउने हो भने २४ घन्टा काम गर्नु पर्छ कि पर्दैन ? २७६ जना यात्रुले कति मानसिक पीडा भोग्नुपर्‍यो ? सोझा मेरा दाजुभाइ दिदीबहिनीलाई यहीँ होटल बस्न टिकट कटाएको हो ?’

‘हामी सबै कर्मचारी भोक, निद्रा, घाम पानी नभनी उडिरहेका छौं । एयरबस आएपछि ९५ प्रतिशत फ्लाइट समयमा उडाएका छौं । प्यासेन्जर बढेका छन् । तर, पत्रकार मित्रहरुले मात्रै हाम्रो टाइममा उडेन भन्छन् । विदेशी एयरलाइन्सका जहाजहरु ढिलो हुँदा कुनै न्युज आउँदैन ।’

‘म चेयरम्यान साबसँग अनुमति लिएर बोल्दैछु । मैले प्राधिकरणका सबै मान्छे खराब भनेको छैन । सिस्टमको कुरा गर्न पाउने कि नपाउने ? (यति बोल्दा) मलाई कालोसुचीमा राख्ने हो ? राखेर कुरा गर्ने भए गरौं । म डराएको छैन । म्याक्सिमम के गर्नुहुन्छ ? लाइसेन्स खारेज गर्नुहुन्छ होइन ? गरे हुन्छ । सत्य बोल्नको निम्ति लाइसेन्स गुमाउन तयार छु, आपत्ति छैन । जहिल्यै नेपाल एयरलाइन्स खराब कति भन्ने ?

लामाको यो अन्तरवार्ता प्रशारण भएपछि नागरिक उड्ययन प्राधिकरणमा छलफलको विषय बनेको थियो । त्यसपछि वैशाख ४ गते प्राधिकरणले लामालाई स्पष्टीकरण सोध्यो । स्पष्टीकरण पत्रमा पनि पदीय मर्यादा विपरीत अभिव्यक्ति दिएको वा अनुशासन उल्लंघन गरेको आरोप भने लगाइएको छैन । अन्तरवार्तामा लामाले आफू थकित र तनावग्रस्त हुने भनेर बोलेको विषयलाई इस्यू बनाइएको छ । तनाव र थकानमा रहने पाइलटले कसरी सुरक्षित उडान गर्न सक्छ भनेर प्रश्न उठाइएको छ ।

प्राधिकरणले सोधेको स्पष्टीकरणमा लामाले कडा जवाफ फर्काएका थिए । उनले प्राधिकरणसँग आफूलाई स्पष्टीकरण सोध्ने अधिकारै नभएको बताएका छन् । प्राधिकरणलाई लामाले दिएको जवाफको व्यहोरा यस्तो छ :

‘हामी सबैलाई थाहा छ कि हामी रुल अफ लबाट प्रशासित छौं न कि कुनै व्यक्ति वा व्यक्तिगत अनुगमनबाट । पत्रमा तपाईंले मलाई स्पष्टीकरण माग्नुभएको छ । कानूनी शासन प्रणाली अन्तरगत कुनै पनि निकायलाई एक व्यक्तिसँग स्पष्टीकरण सोध्नलाई कानूनी अधिकार देखाउनुपर्छ । तपाईंले कुनै कानून देखाउनुभएको छैन, जसले तपाईंलाई मसित स्पसष्टीकरणका लागि अधिकार दिन्छ ।

यो पनि सम्झाउन चाहन्छु कि तपाईंले संविधानले सुनिश्चित गरेको मेरो अभिव्यक्ति स्वतन्त्रता लगायत आधारभूत अधिकारहरुमाथि अतिक्रमण गर्ने प्रयास गर्नुहुँदैन । छोटकरीमा भन्दा तपाईंको पत्र नै वैध छैन किनकि यसलाई कानूनले साथ दिँदैन । साथै तपाईंले प्रयोग गरेको ‘दोहोरो भूमिका’ भन्ने शब्द अपमानजनक छ ।

तपाईंको सूचनाका लागि, मैले १९८८ देखि पाइलटका रुपमा देशको सेवा गरिरहेको छु र त्यसका अतिरिक्त मैले अभिनेता, पत्रकार, सामाजिक कार्यकर्ता र प्रशिक्षकका रुपमा पनि जिम्मेवारी निर्वाह गरेको छु । हालै निगमले मलाई प्रवक्ताको जिम्मेवारी दिएको छ । अहिलेसम्म मैले आफ्ना सबै जिम्मेवारीहरु कुशलतापूर्वक व्यवस्थापन गरेको छु । मलाई ककपिटभित्र पाइलटको भूमिका थाहा छ । युनिफर्ममा हुँदा म पूर्णरुपमा तनावमुक्त हुन्छु र यात्रुहरुलाई सुरक्षित तरिकाले गन्तव्यमा पुर्‍याउन सक्षम छु ।’

प्राधिकरणले पाइलटको लाइसेन्स खारेज गर्न सक्छ ?
नागरिक उड्डयन क्षेत्रको नियामक निकाय प्राधिकरण हो । नागरिक उड्डयन नियमावली ०५८ मा प्राधिकरणलाई पाइलटको लाइसेन्स खारेज वा निलम्बन गर्ने अधिकार दिएको छ । तर, त्यसका लागि केही पूर्वशर्त छन् ।

लामाको सन्दर्भमा प्राधिकरणले आवेशमा आएर रीत नपुर्‍याई निर्णय लिएको देखिन्छ । अधिकारप्राप्त अधिकारीले निरीक्षण गरेर प्रतिवेदन दिएपछि त्यसको आधारमा निगमलाई कारवाहीका लागि सिफारिस गर्नुपर्नेमा सोझै लामालाई पत्र पठाइएको छ । यसमा केही न केही पूर्वाग्रह झल्किन्छ ।

प्राधिकरणले लामालाई सोमबार पठाएको दोस्रो पत्रमा उनले दिएको प्रष्टीकरणप्रति असन्तोष व्यक्त गरिएको छ । पत्रमा लेखिएको छ, ‘तपाईंले पठाउनुभएको स्पष्टीकरण पत्र असान्दर्भिक हुनुका साथै अतार्किक पनि छ । नागरिक उड्डयन प्राधिकरणको एटीपी लाइसेन्सबाहेकका रुपमा तपाईं नेपालको नागरिक उड्ययनसँग सम्वन्धित नियमहरुका बारेमा जानकार हुनैपर्छ । एउटा लाइन क्याप्टेनका रुपमा तपाईंले प्रवक्ताको अतिरिक्त सांगठिनक भूमिकाको औचित्य सावित गर्न सक्नुभएन, जसले सुरक्षित उडानलाई प्रतिकूल प्रभाव पार्न सक्छ ।’ प्राधिकरणको पछिल्लो पत्रपछि लामाले खासै प्रतिक्रिया दिन चाहेका छैनन् । अनलाइनखबरसँग उनले आफू यस विषयमा दुई दिनपछि बोल्ने बताए ।

पछिल्लो कारवाहीपछि सामाजिक सञ्जालमा लामाप्रति जनसमर्थन देखिएको छ । धेरैले उनीमाथि चालिएको कदमलाई आलोचना गरेका छन् ।

लामा कति सही ?
विगत ३२ वर्षदेखि निगममा सेवारत लामा नवौं तहका वरिष्ठ क्याप्टेन हुन् । उनी एयरबसको वाइडबडी बिमान उडाउँछन् । लामाले अमेरिकाको टेक्सासबाट उनले पाइलट कोर्स गरेका हुन् । उनी मल्टिइञ्जिनसम्मको लाइसेन्स लिएर १९८७ मा नेपाल फर्केका थिए । सोही वर्षको जून १ बाट उनले आरएनएसीमा कोपाइलटको जागिर सुरु गरेका हुन् ।

कोपाइलटबाट सुरु गरेका लामा क्रमशः क्याप्टेन, इन्स्ट्रक्टर, चिफ पाइलट, सुपरभाइजर, सुपरीटेन्डेन्ट, ग्राउन्ड इन्स्ट्रक्टर, रिसोर्स म्यानेजमेन्ट इन्स्ट्रक्टर र डेपुटी डाइरेक्टर भए ।

सामाजिक सञ्जालमा र अन्तरवार्तामा आफ्ना धारणा प्रकट गरिरहँदा उनी आफू एक जिम्मेवार सरकारी जागिरे हुँ भन्ने बिर्सिदिन्छन् ।
केही वर्षअगाडि नेपाल एयरलाइन्सले उनीसहित केही पाइलटलाई एयरबसको तालिमका लागि फ्रान्स पठाएको थियो । एनएसीसँग रहेका थोरै एयरबस कमाण्डरहरुमध्ये लामा एक हुन् ।

पहिलेका फिल्मी हिरो पनि भएकाले लामालाई धेरै नेपालीले चिन्छन् । साथै प्रष्टवक्ता र निर्भिक स्वभावका उनी बेलाबखत आफ्नो अभिव्यक्तिका कारण पनि चर्चामा आउने गरेका छन् । पछिल्लो समय उनले देशप्रेमी नागरिकको छवि बनाएका छन् ।

उनी सामाजिक सञ्जालमा विविध विषयमा आफ्नो खुल्ला असन्तुष्टि पोख्ने गर्छन् । केपी शर्मा ओली अघिल्लोपटक प्रधानमन्त्री छँदा उनले लेखेको एउटा स्टाटस निकै चर्चामा आएको थियो । ओलीले निजी क्षेत्रको विमानमा चीन भ्रमणमा गएको विषयलाई लिएर लामाले निराशा व्यक्त गरेका थिए ।
लामाले लेखेका थिए, ‘के बस्नु यस्तो देशमा, जहाँ नेताहरुले राष्ट्रिय ध्वजावाहकको कदर गर्न जान्दैनन् । धिक्कार्छु आफ्नो कर्मलाई, यस्तो अवस्था आउँदा पनि केही गर्न नसक्दा ।’

गत ४ पुसमा निगमले लामालाई निगमको प्रवक्ता नियुक्त गरेको थियो । निगमले एउटा पाइलटलाई प्रवक्ताको जिम्मेवारी दिनु व्यवहारिकरुपमा अनुपयुक्त थियो । प्रवक्ताको भूमिकाका लागि लामा अयोग्य होइनन् । तर उनलाई दोहोरो जिम्मेवारी निभाउन भने सहज थिएन । प्रवक्ता हरेक समय सञ्चार माध्यमको पहुँचमा हुनुपर्छ । तर, उनी आफैं विमान उडाउने भएकाले प्रायः सम्पर्क गर्न कठिन हुन्थ्यो ।

प्रवक्ताले आफ्नो संस्थाको हितमा बोल्नु/लेख्नु स्वाभाविक नै हो । त्यसमाथि लामाले नेपाल एयरलाइन्सलाई हृदयदेखि माया गर्छन् । निगमपछि उनको समर्पणभाव अतुल्य छ । तथापि, कहिलेकाहीँ उनको अभिव्यक्तिमा बढी आक्रामकता र भावुकता पनि छल्किन्छ । सामाजिक सञ्जालमा र अन्तरवार्तामा आफ्ना धारणा प्रकट गरिरहँदा उनी आफू एक जिम्मेवार सरकारी जागिरे हुँ भन्ने बिर्सिदिन्छन् । सामाजिक सञ्जालमा व्यक्त हुने समर्थनले उनलाई प्रोत्साहित गरिरहेको छ ।

सरकारी जिम्मेवारीमा रहेको व्यक्तिले कुनै पनि विवादित विषयमा मुख खोल्दा निकै सोच्नुपर्छ । तर, लामाले भने बेहिच्किचाहट एनसेलको कर विवाददेखि वाइड बडी भ्रष्टाचार प्रकरणसम्म प्रतिक्रिया जनाउँदै आएका छन् । पछिल्लोपटक उनले एनसेलको सिम बहिस्कार गर्न सार्वजनिक आह्वान गरेका थिए ।

अनुभवी र दक्ष पाइलट लामा नेपाल एयरलाइन्सका सम्पत्ति मात्र होइनन्, देशकै गौरव हुन् । उनीबाट अझै परिपक्व व्यवहार अपेक्षित छ ।

जातीय रंग दिने युवराज लामाको प्रयास
विजय लामालाई कारवाही गरिएको खबर सार्वजनिक गरिएसँगै एकाध व्यक्तिहरु यसलाई जातीय रंग दिने प्रयासमा लागेका छन् । आङ्काजी शेर्पाको त कुरा नगर्दा भयो, तर उनलाई पछ्याउँदै युवराज लामाले पनि स्टाटस लेखेपछि यो विषयमा प्रतिक्रिया जनाउनैपर्ने भएको छ ।

लामो समय नेपाल खेलकुद परिषदको कमाण्ड सम्हालेका युवराजले विजय लामामाथिको कारवाहीलाई ‘नस्लवादको भद्दा नमूना’ भन्दै एउटा सक्षम तामाङमाथि राज्यको प्रत्यक्ष र परोक्ष विभेदकारी श्रृंखलावद्ध प्रक्रिया र स्वर्गीय आइजीपी डीबी लामा प्रकरणको निरन्तरताका रुपमा व्याख्या गरेका छन् ।

यति मात्र होइन, युवराजले अब कुलमान घिसिङले समेत सचेत हुनुपर्ने उल्लेख गरेका छन् ।
अहिले विजय लामाप्रति सम्पूर्ण नेपालीहरुको सद्भाव र सहानुभूति छ । उनी कुन जातका हुन् भन्नेसँग कसैको चासो छैन र यो चासोको विषय पनि होइन । तर, युवराज लामाले यसलाई जातीय भड्काव दिएर आफ्नो कुटिल र संकुचित सोचलाई उजागर गरेका छन् ।

सम्वन्धित निकाय सचेत बन्ने हो भने युवराजको स्टाटस साइबर क्राइमको विषय बन्न सक्छ । पाँच वर्षसम्म मन्त्रीभन्दा शक्तिशाली मानिने खेलकुद परिषदको सदस्य सचिव खान के युवराज लामालाई जातले रोकेको थियो ?

Categories
ताजा समाचार

मुख्यमन्त्री पोखरेललाई लक्ष्य गरी फेरि बम विस्फोट !

रोल्पा – रोल्पाको त्रिवेणी गाउँपालिकाको जुगारमा मंगलबार बिहान ११ बजे पनि बम विस्फोट भएको छ। प्रदेश ५ का मुख्यमन्त्री शंकर पोखरेल हिँडेको सडक नजिकै बम विस्फोट भएको हो।

तिला पर सडक नजिकै जंगलमा बम विस्फोट भएको प्रदेश ५ सभाका सांसद दीपेन्द्रकुमार पुनले जानकारी दिए। सदरमुकाम लिबाङबाट त्रिवेणी गाउँपालिकाको जुगारमा हुने नेकपाको आमसभामा सहभागी हुन मुख्यमन्त्री पोखरेल त्यसतर्फ जाँदै थिए। उक्त समयमा बम विस्फोटको भएको खबर आफूले पाएको प्रमुख जिल्ला अधिकारी गञ्जबहादुर एमसीले बताए।

तर, मुख्यमन्त्रीसँगे गएका रोल्पा प्रहरी प्रमुख डीएसपी दीपक खड्काले भने बम विस्फोट भएको बारे आफूलाई कुनै जानकारी नआएको बताए। भने, ‘सामान्य केही वस्तु पड्काएका होलान्, ठूलो केही होइन।

सोमबार पनि मुख्यमन्त्री पोखरेललाई लक्ष्य गरी रोल्पा सदरमुकाम लिबाङ नजिकै तित्रीकोट जंगल क्षेत्रमा विस्फोट भएको थियो। घटनाको जिम्मा नेत्रविक्रम चन्द ’विप्लव’ नेतृत्वको नेकपाले लिइसकेको छ।

Categories
मनोरंजन

प्रपाेजहरु आइरहन्थे तर त्यसलाई ह्याण्डिल गरेर अगाडि बढेँ : गायिका शशी

शशी रावल नेपाली पार्श्व-गायन क्षेत्रकी एक गायिका तथा मोडल हुन् । उनी सन् २००७मा पहिलो सांगीतिक एल्बम ‘ईन्ट्रान्स’ मार्फत नेपाली सांगीतिक क्षेत्रमा प्रवेश गरेकी थिइन् । यसै एल्बमको ‘चाहना सकियो, बहाना सकियो..’ बोलको गीतबाट नेपाली सांगीतिक क्षेत्रमा उनले चर्चा बटुल्न सफल भएकी थिइन् । हाल अमेरिकामा रहेकी गायिका रावलसँग न्यूज २४ का लागि कृष्ण कुमारी चाैँलागाईले गरेकाे अन्तरसंवाद-

नेपाली गीत-संगीत क्षेत्रमा पछिल्लो समय निकै रुचाइनुभएकाे छ, व्यस्तता निकै छ होला ? आजभोलि केमा व्यस्त हुनुहुन्छ ?
खासमा आजभोलि व्यस्त नै चाहिँ छैन, २०१८ मा स्टेज कार्यक्रममा धेरे गीत गाएको कारण भोकल रेस्ट गर्नुपर्ने अवस्था आयो । सोही कारण अहिले भोकल रेस्ट कै क्रममा छुँ । हाल नेपालाबाहिर भएको कारण पनि घरव्यवहारमा नै व्यस्त छुँ भन्दा पनि होला ।

नेपाली संगीत क्षेत्रको विकासलाई कसरी नियाल्नुभएको छ ?
नेपाली गीत संगीतको क्षेत्रमा निक्कै नै सुनौँला आयामहरु थपिएका छन् । सुरु-सुरुमा जस्तो क्यासेटको भरमा गायक-गायिकाहरु बस्नुपर्ने अवस्था छैन । गीत-संगीतबाट पनि बाँच्न सकिन्छ भन्ने अहिलेको संगीतको क्षेत्रले देखाएको छ । हरेक सकारात्मक कुरासंगै नकारात्मक कुराको विकास पनि भएको छ । कहिलेकाहीँ चैँ पहिलाको संगीतको समय गोल्डेन थियो भनेजस्तो लाग्छ ।

त्यो बेला जब क्यासेट खूब बेचिन्थे र अहिलेको सांगीतिक बजारलाई कसरी मूल्याङ्कन गर्नुहुन्छ ?
मेरो पनि क्यासेट बेच्ने समयको लास्ट-लास्ट समय थियो । २००७ तिरको समयको कुरा हो, त्यो समय क्यासेट बेच्दा कति उत्साह हुन्थ्यो । बजारमा फलानोको त यति क्यासेट बिक्री भयो रे, क्यासेटको माग बढेको छ भन्दा गायक गायिकालाई आउने फिलिङ्स् नै फरक थियो । अहिले युटुबको समय आएको छ, यसले पनि आफ्नो गीतको भ्यूज कति छ भन्ने त स्पष्ट पारेको छ । तर जति पहिलाकाे उत्साह, कौतुहतला हुन्थ्यो, त्यो अहिले छैन ।

अहिले संगीत क्षेत्रका चुनौतीहरु के छन् ?
अहिलेको गायक गायिकाहरु आउने जाने क्रम छ । जस्तो पनि गीत आउने क्रम बढी रहेको छ । एक किसिमले हेर्दा अवसर धेरै पनि छ पहिलाको भन्दा चुनौती धेरै नै छन् । नेपाली संगीतको बजार फराकिलो भइसकेको अवस्थामा यतै हराउने सम्भावना पनि बढेको छ । गीत-संगीतको क्षेत्रमा पनि अनेकाैँ किसिमका विसङगतिहरु बढिरहेका छन् । जस्ले गर्दा पनि समस्या उब्जिएको छ ।

पप गीत गाउनुहुन्छ, पप गाउनेलाई समाजले हर्ने दृष्टिकोण नै फरक छ नि होईन र ?
मलाई त त्यस्तो लाग्दैन । संगीतमा पनि फरक टेस्ट रोज्ने श्रोताहरु अहिले छन् । प्राय गीत संगीत मन नपराउने मान्छे कमै हुन्छन् । पहिलाको समयमा पप गीत भन्दा ‘यस्तो पनि गीत हुन्छ र’ भन्ने थियो । तर अहिले हरेक मानिसको मानसिकता परिवर्तन भइरहेको छ ।

तपाईले गाएका प्राय: गीतहरु चर्चामा रहे ? यो चैँ कसरी ?
मैले थोरै गीत गाएँ तर धेरै श्रोता कमाएँ । मेरो ‘चाहना सकियो…’ भन्ने गीतले नै नेपाली संगीतको मार्केटमा नाम राख्न सफल भयो । सो गीतका श्रोताले मेरा अन्य गीतहरुलाई पनि माया दिनुभयो ।

हुन त मेरो गीत चर्चामा आउनुमा मेरो एकजनाको हातभन्दा पनि नेपाली श्रोताहरुको हात छ । मेरो स्वरलाई यदि मन नपराउनु भएको भए म संगीत क्षेत्रमा त्यसै हराउने पो थिए कि ! मेरा गीत चर्चामा रहनुको कारण अर्को चाहिँ सबैजनाले ‘मेरो स्वर फरक खालको छ’ भन्नुहुन्थ्यो, सोही कारण पनि हुन सक्छ ।

शशी रावललाई विवाहपछि संगीतलाई माया मारेर अमेरिका लागेको आरोप लाग्छ नि ?
संगीतलाई माया मारेको भन्नचाहिँ अलि मिल्दैन । संगीतको क्षेत्रलाई नजिकबाट हेरेको छु । परिवार र संगीतलाई ब्यालेन्स मिलाउनको लागि मात्र अमेरिका आएको हो । यहाँ बसेपछि झन् क्यापेबल हुन सकिन्छ ।

विवाहपूर्वको कुरा गरौँ- चर्चित गायिका सबैको आँखामा पर्न सफल, कत्तिको आउथ्यो प्रपोज ?
योङ समय भनेको फरक नै हुन्छ , त्यो मलाई मात्र पक्कै होइन होला । त्यसमाथि पप गायिका भनेपछि के हो कसो हो भन्ने कुरा आउने नै भयो । मलाई त्यो समयमा अलिअलि प्रपोजहरु आउथ्यो नआउने होइन तर त्यसलाई ह्याण्डिल गरेर अगाडि बढेँ ।

सामाजिक सञ्जालको जमाना छ, फ्यानहरुले कत्तिको पछ्याउछन् ?
धेरै फ्यानहरुले पछ्याउनुहुन्छ । ‘म तपाईको ठूलो फ्यान हो, प्लिज मलाई फेसबुकमा साथी बनाउनुहोस् न’ भन्ने खालका म्यासेज गर्नुभएको हुन्छ । कत्तिले त थप गीतहरु किन आएनन् भनेर दुखेसो गर्नुहुन्छ ।

कस्ता खालका फोनकल र म्याजेजले वाक्क बनाउँछ ?
कुनै पनि विषयसँग सम्बन्धित नरहेर बकवासजन्य कुराहरुले वाक्क दिक्क बनाउँछ ।

नेपाली गीत-संगीतको थप विकासका लागि के गर्नुपर्ला ?
गीत-संगीतको क्षेत्रकै लागि भनेर धेरै संघ-संस्थाहरु खाेलिएका छन् । नेपाली मार्केट फस्टाउँदै गइरहेको पनि छ । रोयल्टीको कुराहरु पनि उठेको छ, रोयल्टी आयो भने संगीतकर्मी पनि सेक्युर हुन सक्छन्, यसले गीत-स‌ंगीतकाे थप विकास एवं संवर्द्धनमा टेवा दिन सक्छजस्तो लाग्छ ।

तपाईका गीत सन्न आतुर स्रोताहरुलाई कस्तो सरप्राइज लिएर आउँदै हुनुहुन्छ ?
मेरा श्रोतहरुलाई अब नयाँ एल्बम लिएर आउने सोचमा छु । सायद त्यो छिट्टै नै हुन्छ होला । म तयारीको अवस्थामा नै छुँ ।

Categories
अन्तरास्ट्रिय

जापानमा भोलिबाट नयाँ शाही युगको सुरुवात, यसरी बन्दैछन् नयाँ राजा

टोक्यो । जापानी राजा आकिहितोले मङ्गलबार जापानको राजगद्दी त्याग गर्ने भएका छन् । ८५ वर्षीय आकिहितोले केही वर्ष अगाडिदेखि नै आफ्नो स्वास्थ्यको कारण राष्ट्रप्रमुखको भूमिका निर्वाह गर्न असमर्थ भएको जनाउ दिएपछि उनले गद्दी त्याग्ने वैधानिक अनुमति पाएका थिए ।

आकिहितोले राजगद्दी त्यागेको भोलिपल्ट नै युवराज नारुहितोले जापानी राजसिंहासन सम्हाल्ने भएका छन् । अर्थात मे १ बाट युवराज नारुहितोले जापानी राजसिंहासन सम्हाल्ने छन् । जापानमा राजासँग कुनै राजनीतिक अधिकार हुँदैन तर राष्ट्रिय प्रतीकको त्यहाँ राजाको ठूलो सम्मान हुने गरेको छ ।
मे १ बाट जापानमा नयाँ शाही युगको शुरुवात हुदैछ । यसको तयारी स्वरुप हाल सो शाही युगको नाम घोषणा गरिएको छ । सोमबार जापानी सरकारका मुख्य सचिव योशिहिडे सुगाले यसको घोषणा गरेका थिए ।

सुगाले हस्तलिखित वर्णमालाहरुको एक कार्डबोर्ड देखाएर नयाँ युगको नाम ‘रेईवा’ सार्वजनिक गरिएको थियो । हाल जापानमा ‘हेइसी’ युग चलिरहेको छ । तीन दशकसम्म चलेको हेइसी युग यही महिना वर्तमान राजा आकिहितोले गद्दीत्याग गरेसँगै अन्त्य हुनेछ ।
जापानमा सम्राट अनुसार युगको नामकरण गरिन्छ । प्रधानमन्त्री शिन्जो आवेले शब्दको अर्थ व्याख्या गर्नका लागि देशबासीको नाममा सम्बोधन गर्ने छन् ।

आफ्नो खराब स्वास्थ्यका कारण गद्दी त्याग्न चाहेको सम्राट आकिहितोले तीन वर्षअघि नै बताएका थिए । जापानमा गरिएका मत सर्वेक्षणहरूले अधिकांश जापानीहरूले सम्राटको गद्दी त्याग्ने मनशायको समर्थन गरेका थिए । त्यसको एक वर्षपछि संसद्ले उनको गद्दीत्याग सम्भव तुल्याउन कानुनसमेत पारित गरेको थियो ।

सम्राट आकिहितोले गद्दीत्याग गरेपछि राजगद्दि सम्हाल्न लाग्नु भएको नारुहितो जापानका १२६ औँ सम्राट हुनु हुने छ । उहाँ गद्दीनसीन भएपछि जापान ‘रेईवा’ युगमा प्रवेश गर्नेछ ।

युवराज नारुहितो र युवराज्ञी मासाको एक्लो सन्तानको रूपमा राजकुमारी आइको सन् २००१ मा जन्म भएको थियो तर जापानको वर्तमान कानुनले महिलालाई गद्दी आरोहण गर्न अनुमति दिएको छैन । नारुहितो सम्राट भएपछि फुमिहितो युवराजका रूपमा राजगद्दीको उत्तराधिकारी हुनेछन् । त्यसपछिको क्रममा फुमिहितोका छोरा हिसाहितो हुनेछन् ।

Categories
ताजा समाचार

कैलालीको लम्कीबजार तनावग्रस्त, प्रहरीद्वारा लाठीचार्ज र दर्जनौं सेल अश्रु ग्यास प्रहार

कैलाली । ट्रकको ठक्करबाट एकजना छात्राको मृत्यु भएपछि सुरु भएको प्रदर्शनले कैलालीमा उग्ररुप लिएको छ । पूर्वबाट पश्चिमतर्फ जाँदै गरेको ना७ख ९२३३ को ट्रकको ठक्करबाट मंगलबार विहान लम्की बहुमुखी क्याम्पसमा अध्ययनरत छात्रा सुनीता रावलको मृत्यु भएको थियो । सो घटनापछि सुरु भएको प्रदर्शनले अहिले लम्की बजार तनावग्रस्त बनेको हो । प्रदर्शनका क्रममा केही प्रहरी र स्थानीय घाइते भएका छन् ।

स्थिति नियन्त्रणमा लिन प्रहरीले लाठीचार्ज गर्नुका साथै दर्जनौं सेल अश्रु ग्यास प्रहार गरेको छ । स्थिति नियन्त्रणमा लिन प्रहरीलाई अहिले हम्मे हम्मे परिरहेको छ । त्यहाँ अहिले सशस्त्र प्रहरी पनि परिचालन भएको छ । जिल्ला प्रहरी कार्यालयबाट थप जनशक्ति मगाइएको छ ।

प्रहरीले ट्रक चालक सुनील भण्डारीलाई नियन्त्रणमा लिएर कारबाही गर्ने बताएको छ स्थानीयले ट्रक तोडफोड गर्नुका साथै सडकसमेत बन्द गराएका छन् ।कको ठक्करबाट एकजना छात्राको मृत्यु भएपछि सुरु भएको प्रदर्शनले कैलालीमा उग्ररुप लिएको छ । पूर्वबाट पश्चिमतर्फ जाँदै गरेको ना७ख ९२३३ को ट्रकको ठक्करबाट मंगलबार विहान लम्की बहुमुखी क्याम्पसमा अध्ययनरत छात्रा सुनीता रावलको मृत्यु भएको थियो । सो घटनापछि सुरु भएको प्रदर्शनले अहिले लम्की बजार तनावग्रस्त बनेको हो । प्रदर्शनका क्रममा केही प्रहरी र स्थानीय घाइते भएका छन् ।

स्थिति नियन्त्रणमा लिन प्रहरीले लाठीचार्ज गर्नुका साथै दर्जनौं सेल अश्रु ग्यास प्रहार गरेको छ । स्थिति नियन्त्रणमा लिन प्रहरीलाई अहिले हम्मे हम्मे परिरहेको छ । त्यहाँ अहिले सशस्त्र प्रहरी पनि परिचालन भएको छ । जिल्ला प्रहरी कार्यालयबाट थप जनशक्ति मगाइएको छ ।

प्रहरीले ट्रक चालक सुनील भण्डारीलाई नियन्त्रणमा लिएर कारबाही गर्ने बताएको छ स्थानीयले ट्रक तोडफोड गर्नुका साथै सडकसमेत बन्द गराएका छन् ।

Categories
राजनीतिक

प्रदेश नम्बर २ को सरकार ढाल्ने दाहालको संकेत

काठमाडौं– नेपाल कम्युनिस्ट पार्टीका अध्यक्ष पुष्पकमल दाहालले प्रदेश नम्वर दुईको सरकार परिवर्तन हुन सक्ने चेतावनी दिएका छन्। मंगलबार खुमलटार स्थिति निवासमा आयोजित पार्टी प्रवेश कार्यक्रममा बोल्दै उनले प्रदेश नम्बर दुईको सरकार जनताको हित अनुसार नचलेको भन्दै असन्तुष्टि जनाए। ‘जसरी त्यहाँ सरकार चलेको त्यसले राम्रोसँग काम गर्न सकेको छैन’, उनले भने, ‘तराई मधेसमा पनि कम्युनिस्ट पार्टीको नेतृत्वमा सरकार बन्दा मात्रै त्यहाँ जनताको हित हुन्छ। हामीले चाहने हो भने प्रदेश दुईमा अहिल्यै पनि सरकार बन्न सक्छ।’

वर्तमान प्रदेश सरकारलाई राम्रो काम गर्नुस् हाम्रो साथै हुन्छ भनेर भने पनि यहाँसम्म आइपुग्दा झन् बढी भ्रष्टाचार झन् बढी वेइमानी हुँदै गएको उनले भनाई छ। विकास योजना निर्माणमा व्यक्ति व्यक्तिको फोन नम्बर रेड वुकमा छ भन्दा आश्चार्य लागेको उनले बताए। ‘यही स्थिति हो भने बिचैमा पनि हामीले सरकारको नेतृत्व लिने परिस्थिति आउन सक्‍छ’, दाहालले सरकार ढाल्ने संकेत दिए।

प्रदेश दुईमा संघीय समाजवादी फोरम र राष्ट्रिय जनता पार्टी (राजपा) को संयुक्त सरकार रहेको छ। फोरमा लालवावु राउतले दुई नम्बर प्रदेश सरकारको नेतृत्व गरिरहेका छन्।

वर्तमान प्रदेश सरकारलाई राम्रो काम गर्नुस् हाम्रो साथै हुन्छ भनेर भने पनि यहाँसम्म आइपुग्दा झन् बढी भ्रष्टाचार झन् बढी वेइमानी हुँदै गएको उनले भनाई छ। विकास योजना निर्माणमा व्यक्ति व्यक्तिको फोन नम्बर रेड वुकमा छ भन्दा आश्चार्य लागेको उनले बताए। ‘यही स्थिति हो भने बिचैमा पनि हामीले सरकारको नेतृत्व लिने परिस्थिति आउन सक्‍छ’, दाहालले सरकार ढाल्ने संकेत दिए।

प्रदेश दुईमा संघीय समाजवादी फोरम र राष्ट्रिय जनता पार्टी (राजपा) को संयुक्त सरकार रहेको छ। फोरमा लालवावु राउतले दुई नम्बर प्रदेश सरकारको नेतृत्व गरिरहेका छन्।