Categories
राजनीतिक समाचार

यो म्यादी सरकार होः ओली

काठमाडौं । प्रमुख प्रतिपक्षी नेकपा एमालेका अध्यक्ष केपी शर्मा ओलीले अहिलेको सरकार म्यादी भएको बताएका छन् ।बिहीबार संसदमा नीति तथा कार्यक्रममाथिको छलफलमा सहभागी हुँदै ओलीले शेरबहादुर देउवाको सरकारलाई म्यादी सरकार भएको बताएका हुन् ।

अध्यक्ष ओलीले महाभारतमा पाण्डपहरुसँग सबैकुरा हुँदाहुँदै पनि सकुनी र मन्थराको षड्यन्त्रमा सत्ता खोसिएको कथा सुनाउँदै आफ्नो सत्ता पनि त्यसरी नै खोसिएको बताए ।

काठमाडौं । प्रमुख प्रतिपक्षी दल नेकपा एमालेका अध्यक्ष केपी शर्मा ओलीले गत ३० वैशाखमा भएको स्थानीय तह निर्वाचनको माध्यमबाट राष्ट्रको भविष्यलाई अध्याँरो सुरुङतर्फ धकेल्ने प्रयास भएको बताएका छन्।

प्रतिनिधिसभाकाको बैठकलाई सम्बोधन गर्दै ओलीले यस्तो बताएका हुन्। गत मंगलबार प्रस्तुत भएको नीति तथा कार्यक्रममाथिको छलफलमा सहभागी हुँदै ओलीले जस्तो निर्वाचन हुनपर्ने हो त्यस्तो नभएको बताए।

‘निर्वाचन जस्तो हुनुपर्थ्यो त्यस्तो भएन। निर्वाचन भयो, एउटा खुसीको कुरा हो। तर, जस्तो निर्वाचन हुनुपर्थ्यो त्यस्तो भएन्,’ उनले भने, ‘परिणाम त्यस्तो प्रकट हुन पाएन। किनभने जनताले त्यसरी परिणाम प्रकट गर्न पाएनन्।’

उनले संविधान, लोकतन्त्र र मानव अधिकारलाई नै निर्वाचनले अध्याँरो सुरुङतर्फ लगेको टिप्पणी गरे। ‘यस निर्वाचनको माध्यमबाट हाम्रो संविधान, लोकतन्त्र, मानव अधिकार, मौलिक स्वतन्त्रता र राष्ट्रको भविष्यलाई अध्याँरो सुरुङतर्फ धकेल्ने प्रयास भयो,’ ओलीले भने।

Categories
राजनीतिक समाचार

सत्ता पक्षले बुथ कब्जा गरेर निर्वाचन जित्यो : ओली

काठमाडौँ — पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले स्थानीय तहको चुनाव शान्तिपूर्ण र निष्पक्ष ढंगले नभएको बताएका छन् । सरकारले आर्थिक वर्ष २०७९/८० का लागि प्रस्तुत गरेको नीति तथा कार्यक्रममाथि छलफलमा भाग लिँदै अध्यक्ष ओलीले निर्वाचन स्वतन्त्र, निष्पक्ष र भयरहित वातावरणमा नभएको बताएका हुन् ।

निर्वाचन सम्पन्न भएको १४ दिनसम्म पनि नतिजा नआएको उल्लेख गर्दै ओलीले चुनावमा सत्ता पक्षले धाँधली गरेको आरोप लगाए । ‘एमालेलाई पत्तासाफ गरिदिने’ सत्ता गठबन्धनको घोषित नीति नै भएको र त्यहीअनुसार निर्वाचन गराइएको ओलीले बताए । कतिपय ठाउँमा सत्ता पक्षले बुथ नै कब्जा गरेर चुनाव जितेको उनको आरोप थियो ।

नीति तथा कार्यक्रमको सुरुमा भनिएझैं निर्वाचन स्वच्छ र निष्पक्ष रूपमा नभएको उनले बताए । उनले भने, ‘निर्वाचन स्वच्छ हुन सकन, धाँधलीरहित हुन सकेन । उम्मेदवारलाई थुनेर, बुथ कब्जा गरेर, सत्तापक्षले बुथ कब्जा गर्दा प्रहरी निरीह भएर हेरेको छ । बुथ कब्जा नगर भन्यो भने प्रतिपक्षका कार्यकर्ता गिरफ्तार गरिएका छन् । उम्मेदवारका घरमा बम पड्काइएको छ । उम्मेदवारका घरका स‍दस्य घाइते भएका छन् । शान्तिपूर्ण भयो सबैतिर ?’

विभिन्न जिल्लामा मतदाताको हत्या भएको र त्यो हत्या गठबन्धनका कार्यकर्ताबाट भएको ओलीको आरोप थियो । निर्वाचन सार्न खोज्दा पनि नसकेको र अशान्तिपूर्ण निर्वाचन गरिएको उनको भनाइ थियो । स्वार्थलाई केन्द्रभागमा राखेर लोकतन्त्रको धज्जी उडाइएको भनाइ राखे ।

निर्वाचन अशान्तिपूर्णको नयाँ कीर्तिमान कायम गरिएको ओलीले आरोप लगाए । ‘यस्तो नांगो ढंगले राज्यसंयन्त्रको दुरुपयोग गरेर कब्जै गर्ने खालको सत्तापक्षीय क्रियाकलाप यो तहमा त पञ्चायतले पनि गर्दैन थियो होला । त्यति साह्रो यसपल्ट भयो,’ उनले भने ।

Categories
राजनीतिक समाचार

राजनीतिमा उथलपुथल: नयाँ प्रधानमन्त्रीमा प्रचण्ड, मिति समेत तोकियो !

स्थानीय तहको निर्वाचनको परिणाम आउने क्रम जारी छ। यसपटकको निर्वाचनमा नेपाली कांग्रेस पहिलो दल बनेको छ। दोस्रोमा एमाले र तेस्रोमा नेकपा (माओवादी केन्द्र) रहेको छ। स्थानीय तहको निर्वाचनको पूरा परिणाम नआउँदै सत्ता गठबन्धन भत्किन लागेको चर्चा पनि सुरु भएको छ।

अहिलेको निर्वाचनको परिणामबाट माओवादी केन्द्र उत्साही बनेको छ। उसले ०७४ को निर्वाचनभन्दा आफूलाई सुधारमात्रै गरेन, देशको सत्ता राजनीतिको निर्णायक शक्तिको रुमा पनि स्थापित गरेको छ। सत्ता गठबन्धनका शीर्ष नेताहरुले स्थानीय तहको निर्वाचनको परिणाम सुखद् रहेको प्रतिक्रिया दिईरहेका छन्।

तर, एकीकृत समाजवादी र जनता समाजवादीका केही नेताहरुले भने नेपाली कांग्रेस र माओवादी केन्द्रले चुनावमा इमानदारिता नदेखाएको गुनासो भने गरेका छन्। एमालेले भने यसपटकको निर्वाचनमा ६ वटै महानगर गुमाउने अवस्था छ। आगामी मंसिरसम्म संघ र प्रदेशको निर्वाचन गर्नुपर्ने संवैधानिक प्रावधान छ।

माओवादी केन्द्रका अध्यक्ष पुष्पकमल दाहाललाई भने अहिले नै प्रधानमन्त्री बन्ने अफर आएको चर्चा पनि चलेको छ। एमालेको नेतृत्व तहबाट नै दाहाललाई प्रधानमन्त्री बन्न प्रस्ताव आएको माओवादी केन्द्रनिकट उच्च स्रोतको दाबी छ।

तर, दाहालले भने एमाले नेतृत्वलाई आफू प्रधानमन्त्री बन्नकै लागि अहिलेको गठबन्धन तोड्ने पक्षमा नरहेको जवाफ दिएका छन्। उनले पाँच दलीय गठबन्धन भत्काउनको लागि अहिले षड्यन्त्र भैरहेको पनि टिप्पणी गर्ने गरेका छन्।

स्थानीय तहको निर्वाचन सुरु नहुँदै कांग्रेसका शीर्ष नेताहरुले पनि दाहाललाई यो गठबन्धन कायम रहन्छ कि रहँदैन?कतै कांग्रेसलाई धोका दिने हो कि? भन्दै गठबन्धनको भविष्यबारे सुनिश्चितता खोजेका थिए। भरतपुरमा आयोजित चुनावी सभामा कांग्रेसका नेताहरुले दाहालसामू यस्तो प्रश्न गरेका थिए।त्यतिखेर पनि दाहालले आफू गठबन्धनप्रति ईमानदार बनेको भन्दै विश्वास गर्न आग्रह गरेका थिए।

अहिले एमाले नेतृत्वबाट दाहाललाई संघको चुनाव गराउनेगरि प्रधानमन्त्री बन्न प्रस्ताव आएपनि दाहाल भने गठबन्धन तोडेर त्यस्तो प्रस्ताव स्विकार गर्ने पक्षमा छैनन् उनले प्रधानमन्त्री शेरबहादुर देउवाकै नेतृत्वमा तीनै तहको निर्वाचन हुने दाबी गर्दै आएका छन्। हालै पत्रकार ऋषि धमलासँगको अन्तर्वार्तामा पनि दाहालले यही दाबी गरेका थिए।

यो पनि,

कालिकोटमा दोहोरो गठबन्धनका बाबजुद काँग्रेस दुई पालिकामा सीमित, एमाले शून्य माओवादीको वर्चश्व रहेको कालिकोट जिल्लामा स्थानीय तह निर्वाचन अन्तर्गत नेपाली काँग्रेसले दोहोरो गठबन्धन गरेको थियो । यद्यपि काँग्रेस ९ मध्ये दुई पालिकामा सीमित भएको छ ।

कर्णालीका पूर्व मुख्यमन्त्री महेन्द्रबहादुर शाहीको गृह जिल्ला कालिकोटमा काँग्रेसले केही पालिकामा नेकपा माओवादी केन्द्र र केही पालिकामा नेकपा एमालेसँग गठबन्धन गरेको थियो ।सत्तारुढ गठबन्धनबीच आपसमा तालमेल गर्ने, नभएमा मित्रवत् प्रतिस्पर्धा गर्ने तर गठबन्धन घटक बाहिर तालमेल नगर्ने सहमति भए पनि काँग्रेसले एमालेसँग समेत यो जिल्लामा तालमेल गरेको थियो । माओवादी केन्द्रले पनि एमालेसँग तालमेल गरेको थियो ।

२०७४ को स्थानीय तहको निर्वाचनमा माओवादीले नौवटा स्थानीय तहमध्ये पाँच स्थानीय तहमा प्रमुख/अध्यक्ष र ६ मा उपप्रमुख/उपाध्यक्ष र ३४ वडा वडामा जित हासिल गरेको थियो ।

दोस्रो शक्ति एमालेले तीन पालिकाको प्रमुख/उपप्रमुख र २६ वडामा जितेको थियो । यस्तै नेपाली काँग्रेसले एउटा पालिका र १६ वटा वडामा जितेको थियो ।
यो पटक भने एमाले–काँग्रेसको शक्ति सन्तुलनमा फेरबदल आएको छ । माओवादी केन्द्रले वडामा आफ्नो प्रभाव बढाए पनि अघिल्लो चुनावको तुलनामा २ उपप्रमुख/उपाध्यक्ष गुमाएको छ ।

माओवादी केन्द्रले यस पटक पनि पाँच वटै पालिकाको नेतृत्व पाएको छ भने चारवटामा उपप्रमुख/उपाध्यक्ष र ४८ वटा वडामा आफ्नो वर्चश्व कायम गरेको छ । यस्तै काँग्रेसले दुई वटा पालिकाको नेतृत्व पाएको छ भने दुई वटामा स्वतन्त्र उम्मेदवारले विजयी प्राप्त गरेका छन् ।सत्तारुढ गठबन्धनको प्रदेशस्तरीय संयन्त्रले यो जिल्लामा तालमेल गरेर जाने सहमति गरे पनि जिल्लामा तालमेल हुन सकेन । नौ मध्ये शुभकालिकामा काँग्रेस–माओवादीबीच तालमेल थियो भने काँग्रेसले गठबन्धनको सर्कुलर विपरीत तिलागुफा नगरपालिकामा एमालेसँग तालमेल गरेर माओवादीलाई पराजित ग¥यो । यस्तै महावै गाउँपालिकामा एमाले–माओवादीबीच तालमेल भएको थियो ।

एमालेले सत्तारुढ घटकका काँग्रेस र माओवादीसँग आफ्नो स्वार्थ अनुकूल विभिन्न पालिकामा छुट्टाछुट्टै तालमेल गरे पनि कुनै स्थानमा वर्चश्व जमाउन सकेन ।
कालिकोटमा नेकपा एमाले विभाजनको असर नराम्रोसँग देखिएको छ । यहाँ एमालेले पाउने अधिकांश भोट नेकपा एकीकृत समाजवादीले पाएको छ । यद्यपि एकीकृत समाजवादीले पनि जित हासिल गर्न भने सकेन ।

०७४ मै एमालेबाट जनप्रतिनिधि भएका धेरैजसो नेता नेकपा एकीकृत समाजवादीबाट उम्मेदवार बनेका थिए । उनीहरुले एमालेको भोट काटेका छन् । समाजवादीकै नेता कमल शाहीले खाडाचक्रमा एमालेलेलाई पराजित गरे । शाही स्वतन्त्रबाट लडेका थिए । एमालेले जिल्लाका तीन पालिकामा उपप्रमुख/उपाध्यक्षमा जितेको छ ।

Categories
राजनीतिक समाचार

हाम्रो देशमा गफाडीहरु मात्र जन्मिएका छन्ः माधव नेपाल

काठमाडौं । पूर्व प्रधानमन्त्री तथा नेकपा (एकीकृत समाजवादी) का अध्यक्ष माधव नेपालले देशमा गफाडीहरु जन्मिएको बताएका छन् । मंगलबार नेकपा एस मकवानपुरले हेटौंडा उपमहानगरपालिकामा निर्वाचित भएका जनप्रतिनिधीहरुलाई बधाई तथा मतदाताहरुलाई धन्यवाद कार्यक्रममा बोल्दै नेपालले देशमा अनेक किसिमका गफ दिने गफाडीहरु जन्मिएको बताएका हुन् ।

उनले नेकपा एमाले अध्यक्ष केपी ओलीलाई इङकित गर्दै रेल ल्याउँछु, के ल्याउँछु भन्दै गफ दिएको बताएका हुन् । ‘जनताले के के न आउला भनेर आस गरे तर केही पनि आएन’ उनले भने ।

उनले हेटौंडाको मेयरमा निर्वाचित मीना कुमारी लामालाई बधाई दिँदै विगतमा हेटौंडाका मेयरहरुले गरेका राम्रा कामहरुलाई आत्मसाथ गर्दै काम गर्न आग्रह गरेका छन् ।

‘जनता र नेताको सम्बन्ध भनेको नङ र मासु जस्तै हो,’ उनले भने ‘जनतासँगको सम्बन्धलाई बलियो बनाउनुस्, ।’ उनले आउँदो मंसिरभित्र नै प्रदेश र प्रतिनिधिसभाको निर्वाचन हुने बताएका छन् । आठ महिनाको छोटो अवधीमा यो उपलब्धी पार्टीको सानो उपलब्धी नभएको बताएका छन् ।

‘शक्ति र संगठनलाई निर्माण गर्नुपर्दछ, असल गुण भएकाहरुलाई सम्मान गर्नुपर्दछ, उनले भने ‘हामीले असल मानिसहरुको खोजी गरिरहेका छौं, युवा पिढी खोजीरहेका छौं ।’

उनले आफ्ना कार्यकताहरुलाई धरान उपमहानगरपालिकाको मेयरमा स्वतन्त्र निर्वाचित भएका हर्कराज राई साम्पाङजस्तै बन्न आग्रह समेत गरेका छन् । असल गुण भएको मान्छेलाई सम्मान गर्नुपर्ने भन्दै कार्यकर्ता र नवनिर्वाचित जनप्रतिनिधिहरूलाई पनि सोहीअनुसार काम गर्न निर्देशन दिए ।

‘विभिन्न ठाउँमा कुनै गठबन्धनको सहयोग बिना नै हाम्रो सिंगो प्यानल विजयी भएको छ,’ उनले भने ‘गठबन्धनको प्रत्येक घटकहरुले चुनावमा भाग लिएका थिए तर सबैले आ–आफ्नो हैसियत मत परिणाममा देखेका छन् ।’

Categories
राजनीतिक समाचार

भरतपुर ताजा अपडेट : १,०१,९४५ मतगणना सकियो, कसको कति मत पुग्यो ?

भरतपुर महानगरपालिकामा एक लाख १९४५ मतगणना सकिएको छ । पछिल्लो मत परिणामअनुसार सत्ता गठबन्धनको मेयरकी साझा उम्मेदवार माओवादी केन्द्रकी रेनु दाहालले ९०१९ मतले अग्रता कायम गरेकी छन् । रेनुले ४०,५८९ मत प्राप्त गर्दा नेकपा एमालेका उम्मेदवार विजय सुवेदीले ३१,५७० मत प्राप्त गरेका छन् ।

यस्तै स्वतन्त्रबाट उम्मेदवारी दिएका जगन्नाथ पौडेलले १३,०६४ मत प्राप्त गरेका छन् । त्यस्तै काँग्रेसबाट उप मेयरमा उम्मेदवार चित्रसेन अधिकारीले ४२,७३२ मत प्राप्त गरेका छन् भने राप्रपाकी उम्मेदवार हिमला गुरुङले २४,९९२ मत प्राप्त गरेकी छन् ।

मोरङको सुन्दरहरैचा नगरपालिकामा एमाले विजयी

मोरङको सुन्दर हरैचा नगरपालिका प्रमुख र उपप्रमुखमा एमालेका उम्मेदवार विजयी भएका छन् । मेयरमा केदारप्रसाद गुरागाईंले कांग्रेसका शिवप्रसाद ढकाललाई ७ सय २७ मतले हराउँदै विजयी भए । ढकाल निवर्तमान मेयर हुन् । गुरागाईंले २१ हजार ४ सय ५ मत ल्याउँदा ढकालले २० हजार ६ सय ७८ मत ल्याए ।

त्यसैगरी उपमेयरमा एमालेकै अकली चौधरी विजयी भएकी छन् । उनले २२ हजार ४ सय ५२ मत ल्याउँदा माओवादी केन्द्रका नवराज चापागाईंले ११ हजार ३ सय मत ल्याए ।यहाँ कांग्रेस र माओवादी केन्द्रको मेयर र उपमेयरमा गठबन्धन थियो । योसँगै मोरङका १७ पालिकाको अन्तिम परिणाम सकिएको छ ।

कञ्चनपुरको पुनर्वास नगरपालिकामा कांग्रेस विजयी

कञ्चनपुरको पुनर्वास नगरपालिकाको मेयर, उपमेयरमा कांग्रेस विजयी भएको छ । मेयरमा तोयप्रसाद शर्मा र उपमेयरमा भुलियाकमारी राना विजयी भएका हुन् । शर्माले १० हजार ६ मत प्राप्त गरे भने उनका निकटतम प्रतिद्वन्द्वी एमालेका पदम पुजाराले ४ हजार ६ सय ७४ मत प्राप्त गरे । एकीकृत समाजवादीका जीवनराज थापाले ३ हजार ७ सय ३४ मत प्राप्त गरे ।

उपमेयरमा निर्वाचित रानाले ७ हजार ३ सय ४५ मत प्राप्त गरिन् । उनका निकटतम प्रतिद्वन्द्वी माओवादी केन्द्रका धोखे रानाले ५ हजार ४ सय ९२ र एमालेकी सुशिला खत्रीले ५ हजार ३ सय ३ मत प्राप्त गरिन् ।

Categories
राजनीतिक समाचार

रेणु दाहाललाई कसैले नसक्ने !

काठमाडौं । भरतपुर महानगरपालिकाको मेयरमा फेरि पनि रेणु दाहालको जित सुनिश्चित भएको छ । २८ हजार १९५ मत गन्न बाँकी छँदा पाँच दलीय गठबन्धनबाट मेयरकी उम्मेदवार माओवादी केन्द्रकी दाहालले ३९ हजार ४१६ मत प्राप्त गरेकी छन् ।

दाहालका निकटतम प्रतिस्पर्धी नेकपा एमालेका विजय सुवेदीले ३० हजार ६६० मत प्राप्त गरेका छन् । भरतपुरमा एक लाख २७ हजार ८३९ मत खसेकोमा हालसम्म ९९ हजार ६४४ मतगणना गरिएको छ ।

वडा नम्बर ४ को मतगणना देखि नै लगातार अग्रता लिँदै आएकी दाहाल सुवेदीभन्दा आठ हजार ७५६ मतले अगाडि छन् । अहिले भरतपुर–२१ र २२ को मतगणना भइरहेको छ । दुवै वडामा गठबन्धनका उम्मेदवार अगाडि छन् । सात वटा वडाको पुरै मत गन्न बाँकी छ ।

कुनै चमत्कार भएको अवस्थामा बाहेक सुवेदीले जित्ने सम्भावना देखिँदैन । एमालेका वडा अध्यक्षका उम्मेदवारले पाएको भोट एमालेकै मेयरका उम्मेदवार सुवेदीले पाएका छैनन् । एमालेको गढ मानिएको वडामा नै मेयरमा दाहाललाई दिएर बाँकी पदमा एमालेका उम्मेदवारलाई मत दिएको पाइएको छ ।

कांग्रेसका बागी उम्मेदवार जगन्नाथ पौडेलका कारण पनि रेणु दाहाललाई जित्न सहज भएको छ । पौडेलले अहिलेसम्म १२ हजार ८१० मत ल्याएका छन् । असन्तुष्ट कांग्रेसीबाट सुवेदीलाई जान सक्ने मत पौडेलले रोकेका छन् ।

मेयरमा सुवेदीलाई दाहालले धेरै मतान्तरले पछाडि पारे पनि माओवादी केन्द्रले पाएको वडा अध्यक्ष पद जित्न सकेको छैन । २२ नम्बर वडाको मत गणना भइरहँदा माओवादीले एउटा मात्रै वडा जितेको छ ।

उपमेयरमा गठबन्धनका उम्मेदवार नेपाली कांग्रेसका चित्रसेन अधिकारीले ४१ हजार ६६७ मत ल्याएका छन् । उनका निकटतम प्रतिस्पर्धी राप्रपाकी हिमला गुरुङले २४ हजार २६७ मत ल्याएकी छन् ।

Categories
राजनीतिक समाचार

कृष्णप्रसाद जसले मेयर जितेर पनि अबिर लाएनन्, विजय र्‍यालीमा सहभागी हुन पाएनन्

कांग्रेसको गढको रुपमा चिनिने अर्घाखाँचीको सन्धीखर्क नगरपालिकामा नेकपा एमालेका उम्मेदवार कृष्णप्रसाद श्रेष्ठ निर्वाचित भएका छन् ।

सत्तारुढ गठबन्धनबाट नेपाली कांग्रेसकी उम्मेदवार शान्ता भण्डारीलाई एक हजार ८०१ मतान्तरले पराजित गरेर श्रेष्ठ सन्धीखर्कको मेयरमा निर्वाचित भएका हुन् । श्रेष्ठले ११ हजार १३८ मत ल्याए भने गठबन्धनकी भण्डारीले ९ हजार ३३४ मत मात्र ल्याइन् । उपप्रमुखमा पनि एमालेकी मिश्रा आचार्य ९ हजार ६४६ मतका साथ विजयी हुँदा नेकपा माओवादी केन्द्रका राजेन्द्र भुसालले ९ हजार १६८ मत मात्र ल्याउन सके ।

मेयरमा निर्वाचित श्रेष्ठले विजयी भएर पनि अबिर भने लगाउन पाएनन् । विजयी जुलुसमा पनि गएनन् । आमाको मृत्यु भएपछि श्रेष्ठ किरिया बसेका छन् । उनले किरियामै बसेको बेला मतदान गरेका थिए श्रेष्ठकी आमा उमाकुमारी श्रेष्ठको वैशाख २६ गते ८६ वर्षको उमेरमा निधन भएको हो । आमाको निधन भएको ५ दिनका दिन वैशाख ३० गते अर्घाखाँची आवासीय मावि बेल्बाटिकाबाट मतदान गरेका थिए ।

यसअघि (२०७४) को पहिलो स्थानीय तह निर्वाचनमा कांग्रेसका कमलप्रसाद भुसालसँग १ हजार १०३ मतले पराजित भएका श्रेष्ठ ५ वर्षपछि त्यही नगरमा फराकिलो मतले विजयी भएका हुन् ।

निर्वाचित भएसँगै लोकान्तरसँगको कुराकानीमा श्रेष्ठले आफ्नो पहिलो प्राथमिकता नगरबाट भइरहको तीव्र बसाइँसराइ रोक्ने भएको बताए । ।

Categories
ताजा समाचार राजनीतिक

अन्तमा फराकिलो अन्तरले भरतपुर महानगरमा रेणु दाहाल बिजयी, एमाले भयो पत्तासाफ !

चितवनको भरतपुर महानगरपालिकामा सत्ता गठबन्धनबाट मेयरकी उम्मेदवार माओवादी केन्द्रकी रेनु दाहालले फराकिलो अग्रता बनाएकी छन् ।

पछिल्लो परिणामअनुसार उनी आफ्ना प्रतिद्वन्द्वीभन्दा ५ हजार ५१८ मतले अगाडि देखिएकी छन् ।

७३ हजार ७८७ गणना गर्दा मेयरकी उम्मेदवार रेनुले २८ हजार ६०८ मत प्राप्त गरेकी छिन् भने एमालेका उम्मेदवार विजय सुवेदीले २३ हजार ९० मत ल्याएका छन् ।

त्यस्तै, स्वतन्त्र उम्मेदवार जगन्नाथ पौडेलले १० हजार १३ मत ल्याएका छन् ।

उपमेयरमा गठबन्धनबाट उम्मेदवार बनेका कांग्रेसका चित्रसेन अधिकारीले ३० हजार ९०१ मत ल्याएका छन् भने एमालेले समर्थन गरेकी राप्रपाकी हिमला गुरूङले १७ हजार ९२० मत ल्याएकी छिन् । भरतपुरमा एक सातादेखि मतगणना जारी छ ।

यो पनि,

‘मनीषी’ मोदीले जगाएको आशा

भारतीय प्रधानमन्त्री मोदीको छोटो लुम्बिनी भ्रमणले नेपाल–भारत सम्बन्धमा ठूलै सुधार हुने आशा जगाएको छ

देशको राजधानी सहर काठमाडौँ ‘बालेन्द्रमय’ भएको यो समयमा, सिद्धार्थ गौतमको पूजा–अर्चनाको उद्देश्यले भारतका प्रधानमन्त्री नरेन्द्र दामोदर मोदी बुद्धजयन्तीको उपलक्ष्य पारेर सिद्धार्थ गौतमको जन्मभूमि लुम्बिनी आउनु संयोग मात्र थिएन ।

प्रधानमन्त्री मोदीजस्ता ज्ञानी पुरुषलाई सिद्धार्थ गौतमको जन्मस्थल लुम्बिनी हो भन्ने ज्ञान नभएको पक्कै होइन । तर, केहीपटक उनको मुखबाट बुद्धको जन्म भारतमा भएको वचन निस्केकै हो । सन्दर्भमा, यो पनि भन्न सकिन्छ– प्रधानमन्त्री मोदीले सिद्धार्थ गौतमबारे ‘गुगल सर्च’ नगरेको हुनुपर्छ ।

गुगल सर्चले इसापूर्व ५६३ मा जन्मिएका गौतम बुद्धको नागरिकता ‘नेपाली’ भनेर उल्लेख गरेको छ । गुगल सर्चका इतिहासकारहरूले सिद्धार्थ गौतमको जन्म नेपालमा भएको ठोकुवा गरेका छन् । त्यसलाई ‘पोलिटिकल्ली करेक्ट’ मान्न सकिन्छ । पूर्ण सत्य र तथ्यसंगत मान्न सकिँदैन ।

संसारका धेरै इतिहासकारले भनेका छन्– नेपाल र भारत दुवै स्वतन्त्र देश हुन् । यी दुवै देश जतिसुकै प्राचीन भए पनि, इसापूर्व ५६३ को समयमा दुवै देशको भौगोलिक आकार र राष्ट्रियता तय भइसकेको थिएन ।

हिन्दू धर्मका साधक तथा राजनेता मोदीलाई यो ऐतिहासिक तथ्यको राम्रो जानकारी छ– सिद्धार्थ गौतमको नागरिकतामाथि नेपाल, भारत, श्रीलंका, बर्मा, थाइल्यान्ड, कम्बोडिया वा अन्य कुनै पनि बौद्धमार्गी देशको दाबीको कुनै अर्थ छैन ।पहिलो त सिद्धार्थ गौतम सारा विश्व ब्रह्माण्डका नागरिक हुन् । संसारमा फैलिँदै गएको अशान्ति र युद्धका सम्भावनालाई समाप्त तुल्याउन सिद्धार्थ गौतमका चिन्तनमा आधारित बौद्ध दर्शनका पञ्चशील, समाधि र प्रज्ञाका सिद्धान्त प्रभावकारी हुने विश्वास संसारभर बढ्दै गएको छ । यो सम्पूर्ण मानव जातिका लागि सुखद कुरा हो ।

भारतीय प्रधानमन्त्री मोदीको लुम्बिनी भ्रमण निकै छोटो समयका लागि भए पनि नेपालको अस्पष्ट, अस्थिर र अधीर राजनीतिमा यो भ्रमणको राजनीतिक महत्व दूरगामी रहेको छ । नेपाल र भारतबीच शासन र सीमानाका विषयमा थुप्रै असहमति छन् ।

दुई देशबीच यी असहमतिको पहाड उपस्थित भए पनि सहमतिका बिन्दुहरू पनि थुप्रै छन् । भारतीय प्रधानमन्त्री मोदीको छोटो लुम्बिनी भ्रमणले नेपाल–भारत सम्बन्धमा ठूलै सुधार हुने आशा जगाएको छ । समय जटिल छ, आर्थिक र सामाजिक दुवै हिसाबले ।

पञ्चशील, समाधि र प्रज्ञाको भूमि नेपालको ओलाङचुङगोलादेखि लोमान्थाङ, डोल्पा र हुम्ला हुँदै बौद्ध धर्मका बिम्बहरू संसारभर फैलिएका छन् । तिब्बतमा दलाई लामाको सरकार हुँदा मुस्ताङको लोमान्थाङ र दोलखाका उत्तरी भेगसँग राजधानी सहर ल्हासाको व्यापक व्यापारिक सम्बन्ध थियो । त्यो सम्बन्ध टुटिसकेको छ ।

तर, धार्मिक सम्बन्ध टुटेको छैन । कतिपय आस्थाशील आत्माहरू नेपालतिर दौडिने अवसरको खोजीमा हुन्छन् । ती क्षेत्रका आस्थाशील मनमा रहेको सिद्धार्थ गौतमको चित्र धमिलो भएको छैन । तिब्बतको जटिल भूगोल भ्रमणको मौका पाउने पर्यटकहरू तिब्बतमा बौद्धधर्मको जरो अहिलेसम्म बलियो रहेको बताउँछन् ।

तिब्बतको राजधानी ल्हासामा अहिले तिब्बती जनसंख्या नगण्य छ । यसको अर्थ चीनले बौद्धमार्गी तिब्बती जनताको पूरै सफाया नगरे पनि उनीहरूलाई देशको अनकण्टार भूभागतिर थन्क्याइसकेको छ ।

मोदीले जाँदाजाँदै नेपालीको मनमा आशाको बिउ रोपे । उनले जनकपुरको भ्रमण गर्दा पर्यटकको चाप ‘ह्वात्तै’ बढेको थियो । मुस्ताङ जाँदा त्यहाँ पनि पर्यटक ‘ओइरिए’ । अब, लुम्बिनी आएका छन् । यहाँको पनि केही ‘कल्याण’ होला कि ?

भारतीय प्रधानमन्त्री मोदीको लुम्बिनी भ्रमण सफल पार्न नेपाल सरकारले कुनै कसर बाँकी राखेन । नेपाल सरकारका परराष्ट्रमन्त्री तथा ख्यातिप्राप्त अर्थशास्त्री डा. नारायण खड्का भारतीय प्रधानमन्त्री मोदीको आवाभगतमा बिहानैदेखि खटिएका थिए ।

शारीरिक र मानसिक दुवै प्रकारका अस्वस्थताका बाबजुद प्रधानमन्त्री शेरबहादुर देउवा भारतीय प्रधानमन्त्री मोदीसँग संयुक्त रूपमा बुद्धपूजनमा लागेका थिए ।

एकातिर वीर अस्पतालमा जीवन र मृत्युसँग संघर्ष गरिरहेका क्यान्सरपीडित भाइको चिन्ता, अर्कातिर बुद्धजयन्तीको पवित्र अवसरमा बुद्ध अर्चनाका लागि छिमेकबाट आएका साधु तथा भारतका प्रधानमन्त्री मोदीको स्वागत–अभिनन्दन गर्नुपर्ने कर्तव्य । प्रधानमन्त्री देउवाका लागि समय अत्यन्त पीडादायक थियो ।

यसबारे मैले परराष्ट्रमन्त्री नारायण खड्कासँग बिहीबार अपराह्न प्रश्न गरेँ, ‘के प्रधानमन्त्री देउवाको स्वास्थ्य र मानसिक अवस्थाबारे भारतीय प्रधानमन्त्रीलाई जानकारी गराएर संकट टार्न सकिँदैनथ्यो ?’ डा. खड्कासँग यसको कुनै जवाफ थिएन ।

भारतीय प्रधानमन्त्री मोदीलाई पवन इन्टरनेसनल होटलमा स्वागत गर्ने जिम्मेवारी डा. खड्काकै थियो । उनले भने, ‘म भोजमा थिएँ । भोजमा त म भइहाल्छु ।’

भारतका प्रधानमन्त्री मोदीको सुरक्षा योजनाअन्तर्गत बुद्धपूजाको कार्यक्रम भारतबाटै निर्देशित थियो । प्रधानमन्त्री मोदीको सुरक्षाको जिम्मा भारतीय कमान्डोले लिएका हुन्छन् । लुम्बिनीको सडक स्वच्छ राख्ने हैसियतसम्म थिएन नेपालका सशस्त्र प्रहरीको । ४४ डिग्री गर्मीमा उनीहरू आत्तिइरहेका थिए ।

परराष्ट्रमन्त्री खड्काको जवाफ चित्तबुझ्दो थिएन । उनको भनाइमा, ‘समयको ठूलो चाप थियो । प्रधानमन्त्री देउवालाई पीडादायक अवस्थाबाट अलिकति फुर्सद दिने अवसर पनि थिएन । दुवै प्रधानमन्त्रीले सँगै बुद्धपूजा र ध्यान गर्ने पूर्वनिर्धारित कार्यक्रम थियो ।

यसमा हामी फेरबदल गर्न सक्ने अवस्थामा थिएनौँ ।

प्रधानमन्त्री निकै पीडादायक स्थितिमा हुनुहुन्थ्यो । जसोतसो उहाँ खेपिरहनुभएको थियो पीडा ।’

परराष्ट्रमन्त्री खड्काको यो कथन नेपाल सरकारको दयनीय अवस्थाको विवरण हो । नेपाल सरकारलाई भारतीय प्रधानमन्त्री मोदीको लुम्बिनी आगमनको सूचना धेरै अगाडि प्राप्त भइसकेको थियो भन्नु उल्टो कुरा हुनेछ ।वास्तवमा भारतका ‘माननीय’ (अनरेबल) प्रधानमन्त्री मोदीलाई नेपालका ‘सम्माननीय’ (राइट अनरेबल) प्रधानमन्त्री शेरबहादुर देउवाले पहिल्यै निम्तो पठाइसकेका थिए । त्यो निम्तो लुम्बिनीको जंगलमा अलमलिएको थिएन ।

प्रधानमन्त्री देउवा अचानक अस्वस्थ भएपछि र उनी भ्रातृ–वियोगको अवस्थामा रहेका वेला भारतीय प्रधानमन्त्री मोदीलाई यो जानकारी दिनुपथ्र्यो । तर, त्यसो गरिएन । शारीरिक र मानसिक दुवै हिसाबले अस्वस्थ रहेका प्रधानमन्त्री देउवालाई जबर्जस्ती घिसारेर ल्याइयो, प्रार्थनास्थलमा ।

त्यो अप्रिय दृश्य सारा टेलिभिजनले देखाए । पत्रपत्रिकामा छापियो । क्यानडामा अर्थशास्त्र पढेर त्यहीँ बिहे गरेका, त्यत्रो अन्तर्राष्ट्रिय सभा–सम्मेलनको अनुभव हासिल गरेका परराष्ट्रमन्त्री खड्कालाई यस्तो अवस्थामा के गर्ने भन्ने प्रोटोकलको ज्ञान थिएन ? थिएन भने सेनाका मानिससँग सोध्न सक्दैनथे ?

नेपालले राजा–महाराजाले चलाएको ल्याङप्mयाङे परराष्ट्र नीतिमा सुधार गर्न सकेको छैन । भाइ–भारदार र डिट्ठा–खरदारको मानसिकताले परराष्ट्र नीति हाँकिरहेको छ ।

राजाको पालामा भारतसँग वार्ता गर्न दिल्ली पुग्ने तत्कालीन श्री ५ को सरकारका अधिकारीको पहिलो काम दिल्लीको प्रसिद्ध साडी बजार करोलबागमा किनमेल गर्नु हुन्थ्यो । अहिले आफ्ना सन्तानका लागि छात्रवृत्ति खोज्नु रहेको छ ।

जे होस्, भारतका प्रधानमन्त्री मोदी कुशी नगरको छोटो बाटो हुँदै मनीषीका रूपमा लुम्बिनी आए । मनीषीकै रूपमा दिल्ली फर्किए । जाँदाजाँदै नेपालीको मनमा ‘आशाको बिउ’ रोपे ।

मोदीजीले जनकपुरको भ्रमण गर्दा पर्यटकको चाप ‘ह्वात्तै’ बढेको थियो । मुस्ताङ जाँदा त्यहाँ पनि पर्यटक ‘ओइरिए’ । अब, लुम्बिनी आएका छन् । यो ठाउँको पनि केही ‘कल्याण’ होला कि ?

Categories
राजनीतिक समाचार

माधव नेपाल र प्रचण्डको पार्टीले एक सिट पनि जिते सबै सम्पत्ति त्यागेर वृन्दावन जाने वाचा गरेका दुर्गा प्रसाई अब त यसो पो भन्न थाले

नेताहरुप्रति पछिल्लो समय जनताको वितृष्णा बढ्नु मध्ये प्रमुख कारण हो उनीहरु आफ्नो बोलीमा स्थिर रहन नसक्नु । पद, प्रतिष्ठा र पैसा कमाउन जे पनि भन्दिने र बोल्दिने हुनाले जनताहरुको नेताप्रतिको विश्वास घट्दै गएको देखिन्छ ।

यसैबीच, स्थानीय निर्वाचनमा नेकपा (माओवादी) र नेकपा (एकीकृत समाजवादी)ले एक ‘सिट’ पनि जिते आफू सन्यास लिएर वृन्दावन जाने वाचार गरेका नेकपा एमालेका केन्द्रीय सदस्य दुर्गा प्रसाईंले बोली फेरेका छन्। प्रकाश सुवेदीको टेलिभिजन कार्यक्रममा उनले आफ्नो बचाउ गरेका हुन् ।

अघिल्लो वर्ष २६ चैतमा भक्तपुरको सूर्यविनायकमा आफूले सञ्चालन गरेको २ अर्ब बढी लागतको तरकारी बजारको उद्घाटन क्रममा उनले नेकपा माओवादी केन्द्र र नेकपा (एकीकृत समाजवादी)ले एक स्थानमा मात्रै जिते भने पनि आफ्नो सबै सम्पत्ति त्यागेर सन्यासी बनी वृन्दावन जाने बताएका थिए।

कार्यक्रमको शुरुमै उक्त भिडिओ क्लिप देखाउँदै सुवेदीले प्रसाईंलाई सोधेका थिए, ‘अब कहिले जाने त वृन्दावन ?’ उक्त प्रश्नको जवाफमा प्रसाईंले भने, ‘वृन्दावन किन जानुप¥यो मैले ? मैले भन्या छु त गठबन्धन नगरेर एक्लाएक्लै जितेर आउनुस् भनेर।”

तर भिडिओमा गठबन्धन नभनेको भन्दै थप प्रश्न सोधिएपछि प्रसाईंले आफूले स्क्रिप्ट लेखेको र त्यसमा गठबन्धन लेखेको बताए। चुनावमा जित्नका लागि टाउको काटेर फाल्छु, कान काटेर फाल्छु भनेर भन्ने गरिएकोमा यसको मतलब विपक्षीको मनोबल घटाउनका लागि भन्ने गरिएको उनले बताए।

Categories
राजनीतिक समाचार

स्वर्ग जान नर्कको टिकट काटेका माधव नेपाललाई एमालेले एक सुकामा पनि लिँदैनः सूर्य थापा

काठमाडौं । नेकपा एमालेका नेता सूर्य थापाले आफ्नो पार्टीको कन्तबिजोग, हरिबिजोग, ऋषिबिजोग केही पनि नभएको दाबी गरेका छन् । नेता थापाले भने, “स्थानीय तहको निर्वाचनमा जनमतको हिसाबले नेकपा एमाले कमजोर भएको होइन । जनताले सबभन्दा बढी भोट एमालेलाई नै दिएका छन् ।

५ दलले गठबन्धनलाई कसिलो बनाएकाले केही ठाउँमा हामीले हारेका हौं । एमालेको कन्तबिजोग, हरिबिजोग, ऋषिबिजोग केही भएको होइन ।” निर्वाचनमा केही ठाउँमा असफल हुँदैमा केपी ओलीले अध्यक्ष पद छाड्नु नपर्ने पनि थापाको जिकिर छ । उनले भने, “अहिले पनि नेकपा एमालेलाई ५० लाख जनताले मतदान गरेका छन् ।

यो मतादेश, जनादेशलाई सम्मान गरेर केपीले देशको नेतृत्व गर्ने हो । कतिपयले केपी ओलीले छाडिदिए हुन्थ्यो भन्ने इच्छा गरेका होलान् । उहाँले छाडे हाइसन्चो होला, कब्जा गरौंला भन्ने दिवास्वप्न देख्नुहुन्न ।”

नेकपा एमालेलाई प्रचण्ड र माधव नेपालको आवश्यकता नरहेको पनि उनले बताए । उनले भने, “माधव नेपाल पनि कुनै कुरा गर्ने हो ऋषिजी ? घिनलाग्दो कुरा नगर्नु न बिहान बिहानै ।

उहाँ त शेरबहादुर देउवाका कान्छी औंला हो । हामी हिलो र धुलो टकटकाएर उठ्छौं । तर हामीलाई माधव नेपाल, प्रचण्डको सहयोग चाहिएको छैन । एमालेले माधव नेपाललाई एक सुकामा दिए पनि लिनुहुन्न । उहाँले गर्न नहुने सबै हर्कत गरिसक्नुभयो । प्रचण्डको पुच्छर समाएर बैतरणी हुँदैन भन्नेमा नेकपा एमाले प्रस्ट छ ।”

आफ्नो जिल्ला प्युठानमा माधव नेपालको पार्टी शून्य भएको पनि उनले बताए । थापाले थपे, “मेरो प्युठान, अर्घाखाँचीमा माधव नेपालको पार्टी आलु आलु छ । अब कांग्रेसले कांग्रेसलाई भोट हालेको स्थितिमा कहीं पनि जित्दैन । माधव र प्रचण्डले स्वर्ग जान नर्कको टिकट काटेका हुन् । शेरबहादुर देउवाको हुक्के, बैठके भएर कांग्रेसको कृपामा केही सिट जितेका हुन् ।

प्रतिपक्षविरुद्ध गठबन्धन गरेर बाघ मार्यौं भनिरहेका छन् । माधव नेपाल, प्रचण्ड, चित्रबहादुर केसीसँग वार्तासार्ता पानी अनलाइनको कुरा हो ।”

एमाले नेता थापाले लुम्बिनी र गण्डकीको प्रदेश सरकार अनि केन्द्रमा कांग्रेसको नांगो दलाली गरेर मोहनविक्रम सिंह र चित्रबहादुर केसीले केही सिट जितेको पनि आरोप पनि लगाए ।

उनले भने, “मेरो पालिका झिमरुखमा ३० वर्ष राइदाइँ र दलमलन गरेको, यहाँका रुखपात, ढुंगामाटो मसाल हुन् भन्ने राजमोले कांग्रेससँग मिलेर पनि जित्न सकेन ।

झिमरुखमा २ वडा पाएको छ । अब झिमरुखमा मसाल उँधौली लाग्यो । त्यसैले मोहनविक्रम सिंह रुवाबासी गरिरहेका छन् । मसालले अघिल्लो संघको निर्वाचनमा वाम गठबन्धनको भूलभूलैयामा लाभ उठायो । ८४ वर्षे बूढाको दाल, चामल चलोस् भनेर हामीले सहयोग गरेको हो । अब त्यो सम्भावना छैन ।”