को बन्ला राखेप सदस्य सचिव !

ताजा समाचार

काठमाडौं– नोबेल कोरोना भाइरस (कोभिड–१९) का कारण मैदानमा ठप्प नेपाली खेलकुद मैदानबाहिर भने यतिबेला निकै चलायमान छ ।

असार १७ गतेदेखि राष्ट्रिय खेलकुद विकास ऐन कार्यान्वयमा आएसँगै राष्ट्रिय खेलकुद परिषद् (राखेप) पदाधिकारीविहीन बनेको छ ।

नेपाली खेलकुदको अभिभावक संस्थाका रूपमा रहेको राखेप पदाधिकारीविहीन बनेसँगै कार्याकारी पद सदस्य सचिवको नियुक्तिको प्रक्रिया सुरु भएको छ ।

खासगरी राजनीतिक नियुक्तिका आधारमा सदस्य सचिव चयन हुने परम्परा तोड्दै यस पटक खुला आह्वानबाट छनोट थालिएको छ । ऐनले सदस्य सचिव खुला प्रतिस्पर्धाबाट चयन गर्नुपर्ने व्यवस्था गरेसँगै सोहीअनुसार नियुक्ति प्रक्रिया सुरु भएको छ ।

युवा तथा खेलकुद मन्त्रालयका सचिवको नेतृत्वमा सदस्य सचिव छनोट समिति गठन भएको छ । समितिमा विज्ञका रूपमा रिम रानाभाट र इन्दिरा निरौला छन् ।

सदस्य सचिवका लागि हालै पदमुक्त सदस्य सचिवदेखि पूर्व खेलाडीहरूसम्म २७ जनाको आवेदन परेको छ, जसमा ३ जना महिला छन् । सत्तारुढ दल नेपाल कम्युनिस्ट पार्टी (नेकपा) का नेता/कार्यकर्ताहरूकै पनि आवेदन परेको छ ।

आवेदकहरूमध्ये तत्कालीन नेकपा माओवादीका पोलिटब्युरो सदस्य तथा नेकपाका केन्द्रीय सदस्य लीलबहादुर थापामगर, नेकपाको खेलकुद महासंघका सदस्य मेघराज पौडेल र तत्कालीन सदस्य सचिव रमेशकुमार सिलवालबीच प्रतिस्पर्धा देखिएको छ ।

समितिले कम्तीमा एक जना महिलासहित तीन जनाको नाम सिफारिस गर्नुपर्ने व्यवस्था ऐनमा छ । पुरूष उम्मेदवार २४ जनाबाट दुई जना छनोट गर्न सिफारिस समितिका लागि पनि चुनौतीपूर्ण छ । समितिका संयोजक रामप्रसाद थपलियाका अनुसार सिफारिस समितिले उम्मेदवारहरूको कार्ययोजना अध्ययन गरिरहेको छ ।

ऐनले खुला प्रस्पिर्धाबाट सदस्य सचिव चयन गर्ने व्यवस्था गरे पनि उम्मेदवारहरू राजनीतिक लबिङमा लागेका छन् । राजनीतिक पहुँचका आधारमा बलियो स्थितिमा रहेका थापामगर, पौडेल र सिलवाल अन्तिम आआफ्नो क्षमता अनुसार राजनीतिक कसरतमा छन् ।

पार्टी अध्यक्ष तथा प्रधानमन्त्री निकट मानिने सिलवाल अन्तिम तीनमा पक्का मानिएका छन् । पार्टीको केन्द्रीय सदस्य रहेका थापामगरले पनि तीन जनामा आफू पर्ने विश्वास लिएका छन् ।

उनले सिलवाललाई आफ्नो प्रतिस्पर्धीका मानेका छन् । प्रधानमन्त्रीको साथ रहेका मानिएका सिलवालले सदस्य सचिव रहँदा पार्टी र विभागीय मन्त्रीलाई अटेर गरेका कारण पार्टीले उनको विकल्प खोजेको थापामगरको भनाइ छ ।

उनी भन्छन्, ‘सिलवालजीले पछिल्लो एक वर्षको कार्यकालमा पार्टीको मर्मअनुसार काम गर्न नसकेको निस्कर्ष पार्टीको छ । पार्टीले नै विकल्प खोजेपछि आवेदन दिएको हुँ ।’

सदस्य सचिवमा आवेदन दिएपछि आफूले प्रधानमन्त्रीलाई भेटेको पनि उनले बनाए । प्रधानमन्त्रीले ‘मन्त्रीसँग कुरा गर्छु’ भनेको उनले बताए ।

सिफारिस समितिले २७ जनामध्येबाट अर्को कसैलाई आफूभन्दा योग्य ठाने उसैलाई सघाउने पनि थापामगरले बताए । उनले भने, ‘मभन्दा योग्य अरू कोही हुनुहुन्छ भने म सहयोग गर्न तयार छु ।’

सदस्य सचिव हुँदा सिलवालले विभागीय मन्त्रीलाई बेवास्ता गरेको, आफू सदस्य सचिव भएकैले साग आयोजना हुन सकेको र नेपालले ५१ स्वर्ण जितेको दाबी गर्ने गरेकोमा मन्त्री जगतबहादुर सुनार विश्वकर्मा रुष्ट रहेको स्रोतहरूको भनाइ छ ।

सिलवाल भने मौन रहेका छन् । नयाँ ऐन कार्यान्वयन भएपछि सिलवालले आवेदन दिएर सदस्य सचिवका लागि दौडधुप नगर्ने बताएका थिए तर बालुवाटारको साथ पाएपछि उनले आवेदन दिएको स्रोत बताउँछ ।

Leave a Reply

Your email address will not be published.