Categories
ताजा समाचार

सर्वोच्चको फैसलाविरुद्ध सरकारी अड्डा एकमत, गुठीको जग्गा व्यक्तिलाई अमान्य

झापा। सर्वोच्च अदालतले व्यक्ति विशेषको प्रभावमा परी अर्बाैं रुपैयाँबराबरको गुठीको जग्गा व्यक्तिको नाममा गरिदिएको भन्दै झापाका सरकारी अड्डाले त्यसलाई कार्यान्वयन गर्न अस्वीकार गरेको छ । सर्वोच्च अदालतका तत्कालीन न्यायाधीशहरु गौरी ढकाल र राजेन्द्र कोइरालाले ९ फागुन २०६६ मा झापाको विर्तामोड नगरपालिकास्थित विर्ताबजारको अनारमनी देवी गुठी स्थानको साढे ५ बिघा जमिन चारजनाको नाममा जोतभोगको व्यवस्था मिलाउनु भनी फैसला गरेका थिए । सो फैसला कार्यान्वयनका लागि सर्वोच्च अदालतको फैसला कार्यान्वयन निर्देशनालयबाट पाँचपटक ताकेता गर्दा समेत झापाका सवै सरकारी अड्डाले यस्तो फैसला कार्यान्वयन नगर्ने आन्तरिक सहमति गरी म्याद गुजारेका हुन् ।

स्थानीय डोमालाल राजवंशीले २०११ सालमा अनारमनी देवी गुठी स्थानका नाममा दान दिएको १३ बिघा जग्गामध्ये साढे ५ बिघामा मोहीको दाबी गर्दै सूर्यकुमार विमली, रमेश महर्जन, टीकादेवी विमली र केशवप्रसाद विमलीले सर्वोच्च अदालतबाट जोतभोग गर्ने व्यवस्था मिलाइदिने भन्ने आदेश गराउन सफल भएका थिए । तर, सर्वोच्चले हचुवामा आदेश दिएको सरकारी अधिकारीको दाबी छ ।

१० वर्षअघि सर्वोच्च अदालतले दिएको सो गुठीको जग्गा व्यक्तिको नाममा चारकिल्ला गरी भोगचलन गर्ने व्यवस्था गरिदिनू भन्ने फैसलालाई झापाका सम्बन्धित सरकारी निकायले कार्यान्वयन नगर्ने भएका हुन् । न्यायाधीशहरुले प्रभावमा परेर सरकारी गुठी जग्गा व्यक्ति विशेषको नाममा जाने गरी फैसला गरेको निष्कर्ष निकाल्दै झापाका मालपोत, नापी, प्रहरी, विर्तामोड नगरपालिका र जिल्ला प्रशासन कार्यालयले अदालतको फैसलालाई आलटाल गर्दै म्याद गुजारेपछि गुठीको जग्गा हडपिने प्रयासबाट बचेको छ । गुठीको जग्गा हडप्ने प्रयासमा लागेका व्यक्ति विशेषकै रुचिअनुसार सर्वोच्च अदालतको फैसला कार्यान्वयन निर्देशनालयले पाँचपटक ताकेता गरे पनि झापाका सरकारी कार्यालयले सो निर्देशनबमोजिम गरेनन् ।

स्रोतका अनुसार सबै सरकारी कार्यालय मिलेर अदालतको फैसलालाई प्रक्रियामा छ भन्दै निश्चित म्याद गुजारिदिएका हुन् ।
भूमि सुधार कार्यालयले मालपोतलाई, मालपोतले नापीलाई, नापीले सीडीओ कार्यालय र सीडीओ कार्यालयले प्रहरीलाई पत्राचार गर्दै ‘प्रक्रिया मात्र पूरा गर्दै छौं’ भन्दै निश्चित समय गुजारिदिएपछि सो फैसला कार्यान्वयन नहुने अवस्थामा पुगेको हो । कुन कुन न्यायाधीशले के के फैसला गरे म जान्दिनँ । यो जग्गा अनारमनी देवी गुठी स्थानकै हो। कसैले भोग चलन गर्छु भन्न नसोचे हुन्छ । धु्रबकुमार शिवाकोटी, प्रमुख, विर्तामोड नपा

यस्तो छ हडप्न खोजिएको गुठी जग्गाको कथा
२०५२ सालमा अनारमनी देवी गुठी स्थानको नामबाट राज गुठीमा परिणत गराई गुठीको जग्गा व्यक्तिको नाममा लगिएको थियो । सर्वोच्चको फैसला कार्यान्वयन निर्देशनालयले ३० वैशाख २०६७, २२ वैशाख २०६९, १० चैत २०७० र २९ साउन २०७२ मा समेत ताकेता पत्र लेख्दै मालपोत कार्यालयलाई चार किल्ला छुट्याइदिन भनेको थियो । विमलीसहित चारजनालाई भोगचलन गर्न दिने व्यवस्था मिलाउनुभन्ने कित्ता नम्बर २९४ को ३८७० वर्ग मिटर र २९५ को ३९८४० वर्ग मिटर डोमालाल रंगशाला र त्यसको वरपरको जग्गा पर्दछ ।

प्रतिधुर ३ देख ४ लाख रुपैयाँ मूल्यमा बेचबिखान हुन सक्ने सो जग्गा चारजनालाई किन भोग चलन गर्न ढिलाइ गरेको भन्दै ७ भदौ २०७२ मा भूमि सुधार मन्त्रालयले झापाको भूमि सुधार कार्यालयलाई समेत ७ दिनभित्रमा सो व्यवस्था मिलाउनू भन्दै पत्राचार गरेको थियो । तर, मालमोत तथा भूमि सुधार कार्यालय झापाले सर्वोच्चको फैसला कार्यान्वयन निर्देशनालय र मन्त्रालयलाई सो फैसला कार्यान्वयन गर्न नसकिने आशयका साथ पत्राचार गरेको स्रोतले बताएको छ ।

‘हामीले तत्कालीन प्रधानमन्त्री गिरिजाप्रसाद कोइरालाले समेत सोही जग्गामा खेलकुद मैदान रंगशालाको शिलान्यास गरेको र सार्वजनिक रूपमा प्रयोग भइरहेको स्पष्ट खुलाएर पत्र पठाएका छौं,’ विर्तामोड नगरपालिका प्रमुख ध्रुवकुमार शिवाकोटी भन्छन्, ‘कुन कुन न्यायाधीशले के के फैसला गरे म जान्दिनँ । यो जग्गा अनारमनी देवी गुठी स्थानकै हो । कसैले भोग चलन गर्छु भन्ने नसोचे हुन्छ । अनारमनी देवी गुठी स्थानको नामको जग्गा कसरी राज गुठीमा अदालतले लाने फैसला गरिदियो र व्यक्तिको नाममा दियो । हामी आश्चर्यचकित छौं । यो कार्यान्वयन हुँदैन । यो अतिक्रमण र अपचलन गरिएको हो कसको प्रभावमा को प¥यो ? गठित सर्वोच्च आयोगले खोजोस् । राज गुठीमा लगेको बखत म तत्कालीन अनारमनी नगर उन्मुख गाविसको अध्यक्ष थिएँ । मलाई थाहा नभई कसरी गुठीमा गयो ? यो भूमाफियाको खेल हो । यो कसैलाई मान्य हँुदैन ।’
उता, तत्कालीन अनारमनी देवी गुठी स्थानका सचिव गणेश ओलीले आफूले नै राज गुठीमा लाने निर्णय गराएको स्विकारे। उनले भने, ‘सबै राजनितिक दलको कमाइ खाने भाँडो भयो । अनि, मेरै पहलमा राज गुठीमा लाने निर्णय भएको हो । तर, कसरी बिना सरोकारवाला व्यक्तिको नाममा जग्गा अदालतले फैसला ग¥यो, मलाई नै थाहा छैन ।’

अनारमनी देवी गुठी स्थानको मोही भनिएका बिर्खबहादुर मगर र शान्तादेवी खड्काको विषयमा सर्वोच्चले केही बोलेको छैन । हाल सो जग्गामा भीमप्रसाद दहालका छोरा श्यामकुमार विष्ट, र बिर्खबहादुर मगरका छोराले घर बनाई बसेका छन् । धनीपुर्जा जो सुकैको नाममा होस्, भोगचलन गर्न आउने अवस्था छैन । आए भने भौतिक सुरक्षामै खतरा छ,’ रंगशालाको संरक्षणमा जुटेका जलकुमार गुरुङ भन्छन् । स्रोतका अनुसार विमली परिवारलगायतले रमेश महर्जनले आफ्नो नाममा ल्याउन खर्चेको २४ लाख रुपैयाँ दिए जग्गा फिर्ता गरिदिने भन्दै विभिन्न माध्यमबाट संवाद गरिरहेको छ ।

Leave a Reply

Your email address will not be published.