Categories
ताजा समाचार

यस्तो छ बैंकबाट लाखौं चोर्ने ‘विद्यार्थी’को अर्को धन्दा

१३ मंसिर, काठमाडौं । काठमाडौंका विभिन्न बैंकबाट करिब ३० लाख रुपैयाँ लुटिएको प्रकरणमा संलग्न ६ भाइमध्येका हुन्, काभ्रेका २१ वर्षीय अञ्जन बराल । पक्राउ परेका सबै जनाविरुद्ध बैंकिङ कसूर सम्बन्धी ऐनअनुसार कारबाही प्रक्रिया अघि बढाउने प्रहरीको तयारी छ ।

बरालविरुद्ध भने दुईवटा कसूरमा मुद्दा चल्न सक्छ । आखिर किन ? यसबारे जान्न दशैंको तीन दिनअघि भएको घटनातिर फर्किनुपर्छ ।

सामाजिक सञ्जाल फेसबुकको एउटा ग्रुपमा मिलन सुब्बाले ३५० सीसीको हन्टर मोटरसाइकल बिक्रीमा रहेको भन्दै तस्वीर पोष्ट गरे । तस्वीर देखेर मोटरसाइकलका सौखिन बराल लोभिए ।

करिब ६ लाख पर्ने मोटरसाइकलको दाम ४ लाख ५० हजार रुपैयाँ भनिएको थियो । सकेण्ड ह्याण्ड भएकाले सस्तोमै बिक्री गरेको सुब्बाको भनाइ थियो ।

पोष्टमा उल्लेख गरिएको मोबाइल नम्बरमा फोन गरेर बरालले खरिद गर्ने इच्छा भएको बताए । बरु मूल्यमा हेरिदिनुपर्ने जनाए । भोलिपल्ट बिहान साढे ९ बजे चप्पल कारखाना छेउ भेट्ने कुरा भयो ।

मोटरसाइकलको एक छेउमा स्क्र्याच भएको देखियो । त्यसपछि बरालले पुनः मोलमोलाइ गर्न थाले । सुब्बा ३ लाख ७५ हजारसम्म घटे । तर, बराल मानेनन् । बरु कर आफैं तिर्ने भन्दै अझै घटाउन लगाए । बल्लतल्ल सुब्बा ५ हजार रुपैयाँ घटाएर मोटरसाइकल बेच्न तयार भए ।

काठमाडौं प्रहरी परिसर, टेकुका प्रमुख एसएसपी उत्तमराज सुवेदीका अनुसार उनले फ्ल्याटको भाडा तिर्दा पनि ‘ब्याक डेट’को चेक दिएर बढी रकम बुझाउने गरेका थिए
‘पैसाचाहिँ चेकमा दिन्छु है…’, बरालले प्रस्ताव तेर्स्याइहाले । एभरेष्ट बैंकमा खाता भएको भन्दै ३ लाख ७० हजार रुपैयाँ बराबरको चेक दिए । दशैंका बेला भएकाले बैंक बन्द भइसकेको थियो । सुब्बाले पैसा निकाल्न पाएनन् ।

बराल भने मोटरसाइकल लिएर काभ्रेको पाँचखालतिर रहेको घरमा आए । दशैंपछि काठमाडौं फर्किए ।

सुब्बाको चेक साटिएको थिएन । बराललाई फोन गरेर त्यसबारे जानकारी गराए ।

‘जम्मा गर्दिहाल्छु है दाइ’, बरालले मायालु पारामा भनेका थिए । पटक-पटक बैंकमा जाँदा पनि सुब्बाले पैसा पाएनन् ।

तिहार लाग्यो । छठ मनाउन भन्दै बराल सर्लाहीमा रहेका आफन्तकहाँ पुगे । त्यहाँ पुगेर भने उनले सीमकार्ड परिवर्तन गरे ।

‘पहिलेको सीम कार्ड हराएपछि अर्को हालेको हुँ’, प्रहरी हिरासतमा रहेका बरालको दाबी छ । तर, नम्बर परिवर्तन भएसँगै उनी लापत्ता भए ।

काठमाडौं प्रहरीले ९ मंसिरमा उनलाई पक्राउ गरेपछि सुब्बाले थाहा पाए । त्यसपछि मोटरसाइकलको पैसा खोज्दै उनी टेकुस्थित प्रहरी कार्यालयसम्म पुगे ।

बरालले पैसा नदिने स्थिति देखेपछि सुब्बा अहिले मोटरसाइकल नै लाने मनस्थितिमा छन् । उनले जाहेरी दर्खास्त दिएमा बरालविरुद्ध चोरी मुद्दा दर्ता हुन सक्छ । तर, मुद्दातिर लाग्दा अन्तिम फैसला नहुञ्जेल मोटरसाइकल नपाइने भएकाले के गर्ने भन्नेमा रनभुल्लमा छन्, सुब्बा ।

बरालका अनुसार उनले कक्षा ११ को परीक्षा त दिएका थिए, तर अनुत्तीर्ण भएपछि पढ्न छाडिदिए ।

Leave a Reply

Your email address will not be published.